【移民新加坡】港媽攜女以家屬准證入籍 外國人身份買樓租屋入學限制多
作為父母選擇移民時,好多時候都優先考慮小朋友未來發展而決定地點。歐美國家當然不乏選擇,反觀亞洲似乎只有新加坡較為理想。Karman與先生都有同樣想法,碰巧工作上的安排,讓一家三口最終選擇移居新加坡。
港爸取工作簽證攜眷入藉
計劃永遠趕不上變化,Karman和先生二人原先沒有考慮過去新加坡,反而有親戚朋友在澳洲、加拿大,甚至曾經想去英國,不過考慮到華人在當地工作機會有限和擔心,最終無疾而終。一年前,機緣巧合之下老公有機會到新加坡工作, 「當時有幾個考慮因素,第一係諗住移民要趁後生,無理由等到四、五十歲先去第二個地方生活。二來,小朋友當時準備出世,都想比佢多個選擇。加上同屋企人關係好好,都會想經常返香港探親,老人家又可以黎探孫女,4小時機程都好方便。另外,覺得當地整體經濟發展、就業機會都多,所以最終選擇公司Offer。」
由於新加坡的投資門檻較高,所以較多人會好似Karman老公先取得工作簽證 (EP) 作為移居第一步,因為只要在當地工作大約1-2年後便可以申請永久居民 (PR)身份。 「在居住期間都要交稅先可以再申請PR,由於各項條件只係最低門檻而唔保證一定成功,所以要真正做到公民,連同審批時間,整個過程最快都需要約5至6年。同埋,政府都會考慮按當時需要邊一個行業人才、或者有小朋友等都會影響申請速度。不過現時申請難度會更高,一來疫情打擊生意而未必會再開放海外職位,二來每間公司都有限制請外國人的百分比,所以難度會再提升。」
租樓多奇怪條款 退租要洗乾淨窗簾
移居最大難題之一就是解決住宿安排,買樓還是租樓必須要事前了解清楚。好似新加坡就十分保護當地國民,對外國人身份和擁有PR的永久居民在印花稅收上都有高達20%的差距。新加坡政府樓-組屋(HDB Flat),只要大學畢業就可以申請等新一批建成上樓,鼓勵年青人成家立室和生育。如果外國人想買二手樓就需要在獲得PR的3年之後先可以入市。「我們現時租住緊HDB類近香港的西灣河、鰂魚涌地段,以住宅區為主,鄰近巴士、地鐵站,交通十分方便。」
正所謂各處鄉村各處例,在新加坡租屋時候會經常有些得意條款要注意「有些租約會寫明無論有無開冷氣都要一年清潔四次,或者離開退場前要先將窗簾洗乾淨。由於細節比較多,所以都建議第一次租樓最好都係搵返代理。」
移居新地方,起居飲食需要從頭適應,作為父母的難度更大。「Karman 考慮到當地食物以濃味為主,所以主要在家煮食。我地一家三口,每月平均花費在飲食上約HK$8,000。如果外出去商場餐廳用餐因為有Sales Tax和加一,價值都比較貴。」
仔女入學 先看家長身份
新加坡實施雙語教育政策,對於Karman而言都係其中一個考慮讓小朋友在當地升學的原因。「政府鼓勵讓父母可以放心上班,所以周圍都有好多Pre-School Centre,而且唔需要好似香港咁又拍片又interview,基本上有錢交學費就有學位。」不過當地入學十分看重父母的身份,以公民、永久性居民和外國人分類而影響派位情況。「教統局會將部份學位優先給予公民,所以外國人可能最終需要入讀國際學校。因此如果小學時先移民來到就好多機會到步後要讀國際學校,因為沒有時間去獲得永久性居民身份。」
Karman在新加坡生活時間不長,不過已經有些心得可以同大家分享。「移民人士最緊要識得調節心理,每個地方都有唔完美,唔好一去到陌生地方就比較,要學習欣賞。當地人其實好Friendly,不同種族聚集一齊可以學識包容,平時在香港未必有咁既機會接觸。黎到新加坡之後,無論係屋企樓下或者上網都識到其他港媽,一齊約出黎交流做朋友,以前係香港反而比較謹慎,呢啲情況反而未必會發生。」
Ms Karman K媽新活
https://youtube.com/c/MsKarman
https://instagram.com/ms.karman
相關文章:
【移民瑞士】搵工注重專業多於學歷 港妻轉做「斜槓族」Slasher發展多職人生
【移民日本】租屋要送禮俾業主?港女488萬購千呎地起Dream House
【移民美國】港妻移居美國組義工團抗疫 轉行開家庭托兒所覓新出路
【移民故事】港妻移民抵英即遇疫情爆發 搵工無期轉戰當Youtuber 無懼再度封城
香港人移民懶人包|6大熱門移民地條件 門檻 方法比較+寵物移民注意事項