紅館圓夢 宣布加場 馮允謙人生大事逐樣嚟 拒做騷結婚

馮允謙認為做音樂最能令自己開心。
馮允謙認為做音樂最能令自己開心。

第2度獲得「叱咤男歌手」銀獎的馮允謙相隔8個月再開騷,更由九展「升呢」到紅館連開3場個唱。他自言星途兜轉,感恩從幫忙拿行李的導遊身上獲得啟發,鼓勵他堅持追夢,成就今日終達成11年來的夢想。他承諾今年迎娶圈外女友,但不考慮在紅館「順便」結婚。

馮允謙(Jay)將於3月25、26日首踏紅館舉行《JAYPOP LIVE@COLISEUM 2023》演唱會,昨日宣布加場,他興奮表示:「完全冇估到,特別開心、興奮,因為仲未公開發售,但反應好好,所以加開27號一場。」他本想第一時間通知身在加拿大的父母,但因時差問題,故暫未能分享喜悅。

Jay坦言踏上紅館是11年前當新人時的夢想,可是期間經歷了6年的低潮期,一度萌生返加拿大轉行之意,直至與女友到馬來西亞遊魔鬼山,看見每日為遊客搬行李的導遊,雖然非身居要職,但活得開心,令他得到啟發:「佢哋唔係搵好多錢都好開心,我發覺自己做音樂、有機會表演時係最開心,加上簽咗依家呢間公司先有今日,好感恩當日我堅持住,想用自己嘅故事鼓勵年輕人唔好放棄。」

買機票等女友捧場

現已積極備戰個唱的他正努力練舞、操肌,至於嘉賓名單要保持神秘,但他個人希望邀到張敬軒、陳奕迅、MIRROR成員及COLLAR等。問可會在開騷期間順道結婚?他斷言否定,因女友作風低調,又笑指女友應不會「放飛機」:「我出機票,佢話會返嚟睇,我聽住先!(佢好似好冷淡喎?)佢都戥我開心,只係佢工作好忙。」