網媒爆梁文禮私下毒舌帖文鬧樂壇事 網民反撐阿禮︰雙唔雙面人又點？

早前商台DJ梁文禮睇完梁詠琪紅館演唱會後，喺社交平台出咗個限時動態大讚Gigi好靚，但就俾網民踢爆佢喺私人facebook狠批Gigi演唱會由編排、編曲、舞蹈以至服裝都一無是處，仲大鬧Gigi唱得差。本來放緊假嘅梁文禮都要立即返商台開咪，公開向Gigi道歉，強調係出於肉緊先至咁寫。

不過話口未完，網媒「田木集作」今日出咗條片，聲稱喺梁文禮私人社交帳戶見到佢過往嘅帖文，鬧過唔少歌手同樂壇事，有啲post仲爆粗添，堪稱係「毒舌DJ」！

根據報導，阿禮個人帳戶出過post批評近期環球唱片搵一批新晉歌手如Anson Lo（盧瀚霆）、曾比特、炎明熹等翻唱張國榮作品嘅企劃，係「集體強姦張國榮作品」。之前佢又私下出post狠批Mirror嘅周邊商品同公仔「點解可以咁醜」，甚至爆粗話「千x祈唔好聽Eason嗰個翻唱版本」嘅莫文蔚作品《慢慢喜歡你》。

報導出街之後，有唔少人留言認為網媒cap低梁文禮私人帖文做報導有問題，而且即使阿禮係雙面人都唔係問題，「我覺得雙唔雙面人又點？人地將批評嘅說話放係自己私下講，public acc盡量唔亂講野，我覺得咁唔係make sense咩？」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！