雅虎香港新聞 環球趣聞｜網紅坐飛機遭後座小童狂踢 倡航空公司推「無小童航班」惹熱議
坐長途機大家都預咗會辛苦，不過問心一句，任你幾大量都好如果見到機上好多小朋友或者BB，個心都會一沉。美國一位網紅日前乘搭長途機時就出Post展示自己「苦況」，佢話後座坐嘅係一位明顯已經超過5歲嘅小朋友，而佢旁邊嘅媽媽一上機就瞓著，而呢位小朋友就不停大叫、哭鬧、仲起勢咁踢佢椅背，從影片背景都聽到小朋友嘅叫喊聲，加上網紅嘅一臉無奈，真係令人感同身受。
該位網紅仲話應該叫航空公司提供「無小孩航班」，佢會唔介意加錢去坐咁話，事後當然引發兩極爭議，唔少網民鬧呢位網紅無同理心、唔夠包容，仲話「他朝君體也相同」，第時佢生咗小朋友就會明白。不過另一邊廂都有人支持，話媽媽一定要管教好坐飛機嘅小朋友，盡量減少佢對其他乘客構成嘅影響，畢竟人人都係畀咗錢買機票，影響其他人乘搭嘅體驗就係唔啱。其實目前世界各地有唔少渡假村都有「無小孩保證」，即係話整間酒店都唔招待某個年齡以下嘅小童，其實都有大量捧場客，不過有無構成歧視就真係見仁見智呢，大家又點睇？
按此下載全新Yahoo APP，緊貼城中好去處、Staycation攻略、行山路線、野餐地點推介，仲有新人禮等你拎，立即下載！
相關文章：
