【繼《美味情緣》再拍無綫劇】重頭劇《多功能老婆》搵楊千嬅做女一

image

無綫重頭劇《多功能老婆》上年搵嚟轉戰內地發展十幾年嘅著名編劇陳寶華擔任劇集總監製和總劇審,之前寶華姐就話杜之克和余詠珊好有誠意,所以不計較酬勞,當一份人情咁送俾無綫。由於寶華姐回歸開劇,所以唔少藝人都主動聯絡,希望有份參演,事前以鄧萃雯飾演女主角嘅呼聲最高。另外,寶華姐亦認為佘詩曼、鍾嘉欣和楊千嬅都係合適嘅人選之一。

之前鄧萃雯就話要多方面配合,如果陳寶華肯寫,佢會考慮返無綫拍劇;亦有傳聞話寶華姐有同楊千嬅傾過。咁邊個係劇集女主角?事前女主角人選極度保密,甚至連劇中演員都唔知,去到今日嘅劇集記招終於公佈啦!女主角就係繼01年《美味情緣》之後再重返無綫拍劇嘅楊千嬅啦!淨係睇套劇嘅英文名叫《Wonder Women》 就知襯晒千嬅咁滯啦!

除咗女主角之外,劇集演員陣容強勁,包括周柏豪、黃浩然、朱晨麗、黃錦燊、洪永城、陳煒及吳若希等。劇集將會喺5月開始拍攝,黃浩然喺劇中飾演楊千嬅嘅老公,個名仲叫返電影《新紮師妹》嘅「劍雄」,唔知楊千嬅劇中個名會唔會叫「麗娟」呢?