羅浩楷椎間盤突出息影多年 罕有現身節目：往事只能回味

人稱「扮嘢王」嘅羅浩楷因為同參加今屆香港小姐面試嘅「東涌羅浩楷」利愛安（Kirsten）撞樣再度受關注，近日佢就喺鄧英敏主持嘅網上節目《老友鬼鬼傾吓偈》大談當年喺娛樂圈嘅深刻經歷。

71歲嘅羅浩楷2004年拍《皆大歡喜》時因大動脈閉塞致心絞痛，2015年拍完劇集《東坡家事》後因為椎間盤突出令腰骨無法挺直而暫停演藝工作，當時需要戴上頸箍，一度要依靠輪椅代步。經過長期治療病情先得以舒緩，但前年開始羅浩楷又出現眼疾問題。

喺《老友鬼鬼傾吓偈》片段中所見，羅浩楷雖然未能坐直，但精神相當唔錯，仲識開玩笑話：「以前完全不舉（脖子），現在可以舉，可以左望右望。」當提到當年17歲因國泰電影公司訓練班入行後，轉拍粵語片而遇上師傅呂奇，佢就即席模仿呂奇嘅經典電影對白，同時表示《難兄難弟》「呂奇」一角好多招牌動作都係由佢構思：「呢個角色係我好辛苦咁創造出嚟，點知最後乜嘢演出都冇我份，唔知咩原因，（影片）出咗嚟之後，個個都扮過，其實係扮我，唔係扮我師傅。」

羅浩楷更回憶當年成為酒廊熱門歌手經歷，指唱歌以外，負責安排藝人到酒廊演出，自爆嗰陣收入唔錯，但因為自己有錢就亂洗，亦試過炒股輸掉百萬，宜家回想只唏噓表示：「不要想當年，往事只能回味。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！