聲夢傳奇2|Jasmine奪冠成「傳奇新星」Sabrina大熱倒灶網民戥唔抵
TVB選秀節目《聲夢傳奇2》喺噚晚舉行決賽,最後五強學員都傾力演唱,競逐總冠軍「傳奇新星」寶座,最終由任暟晴(Jasmine)奪得,亞軍及季軍分別由黃洛妍(Janees)及趙紫諾(Sabrina)奪得,而被睇好嘅女團XiX及趙小婷(Pamela)則奪得第四及第五名。節目播出已有極高嘅討論度,不如而家就同大家睇下網民有咩反應啦!
XiX唔值咁高分 得第四名疑黑面
女團XiX臨時改曲目,用返擅長嘅跳唱應戰,所以就由原定嘅慢歌《那些年》改做鄭欣宜嘅快歌《@princejoyce》,最終獲得22盞綠燈。雖然佢哋得到評審嘅支持,不過唔少網民就認為佢哋唔值咁高分,紛紛留言表示「成隊女團無個識跳舞都算一個奇蹟」、「啲評判真係侮辱緊自己專業」、「22分, TBB做馬做到離晒譜」、「做馬做到咁,唔值22,17都比多」、「6個上陣已經唔公平 咁難聽都咁高分 本身都唔公平唔使期望tvb啲乜」及「唔得 我覺得唔掂」等等。另外,佢哋喺獲得第四名(優秀表演獎)領獎時,部分成員面露失望嘅表情,而隊長劉芷君(Aster)似乎唔係好滿意結果,一啲笑容都冇,被網民指佢疑似黑面。
Sabrina大熱倒灶
趙紫諾Sabrina係今屆嘅大熱人選,佢喺決賽中以自彈自唱范曉萱嘅《我要我們在一起》應戰,結果獲得22盞綠燈,不過喺經過評判及觀眾嘅投票後,被Jasmine及Janees後來居上,導致佢未能打入最後兩強。唔少網民知道Sabrina只獲得季軍都紛紛留言戥佢唔抵,例如「十邊季軍係咪搞笑」、「無十邊唔睇了,垃圾節目」、「一個X叫,一個無感情,還我十邊」、「最唔抵真係sabrina」、「Sabrina今晚既表現值100分, 非常好 TVB個賽制係點, 無所謂, 反正佢就係我心目中既冠軍」、「sabrina先係我心目中冠軍」、「這一首是昨晚最佳表現,畫面非常美麗,聲音辨識度又高,手琴更是一絕,很奇怪人氣投票會輸 Anyway,你已是大家心中的冠軍!」、「今晚最好個個得季軍」及「十邊今次真係超水準」等等。
Jasmine有樣有唱功
任暟晴Jasmine首先以獻唱張學友《我等到花兒也謝了》,結果獲得21盞綠燈,喺經過評判及觀眾嘅投票後反超前,成功打入最後兩強。喺第二回合,Jasmine以快歌上陣,又唱又跳林憶蓮嘅《瘋了》,發揮穩定嘅佢獲得21盞綠燈,加上觀眾投票後,佢順利成為冠軍「傳奇新星」,唔少網民都留言恭喜佢,例如「Jasmine把聲真係好靚 今日個look都好靚」、「老師有台風 但太老太醜 支持jasmine」、「Janees今晚表現真係唔好 輸都合理」、「綿綿世一」、「恭喜jasmine , 實至名歸, 今晚兩首歌都表現得好好, 期待妳之後的個人單曲」「恭喜暟晴勇奪冠軍,人靚聲甜,實至名歸!恭喜 恭喜」、「恭喜Jasmine!! 今晚好靚女,表演好精彩,So proud of you」及「綿綿值得拎冠軍,佢係聲2係平均質素最高果個,相信佢以後會好似GIGI甘發光發熱」等等。
炎明熹表演完勝
上屆冠軍炎明熹(Gigi)獻唱《真話的清高》,雖然Gigi就話自己心情興奮又緊張,不過仍然發揮超水準,網民仲留言大讚佢,留言話「踢館完勝,gigi今晚第一」、「超水準的演出,毋負三料冠軍的冠冕」、「Gi秒哂全場」及「Gigi好聽 滋冧莊算啦」等等。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!