必食自家麻糬窩夫+手工意粉！尖沙咀新開日光慢活Cafe

尖沙咀又多一間打卡Cafe啦！餐廳位於商場六樓，有大落地玻璃窗可以欣賞公園或者街景，加上淺木為主嘅裝修同植物擺設，感覺非常舒適。食物有唔少都係自家製作，好似每日新鮮製作嘅手工意粉、即製窩夫配Q軟鮮奶麻糬等，兼顧打卡同醫肚㗎。

大落地玻璃窗+淺木日系裝修

Ukiyo嚟自日文「浮世」，有活在當下嘅意思，餐廳希望大家嚟到可以放下煩惱，享受美食同慢活一下。廣場七樓日前化身為寵物公園，而Cafe部位座位亦係寵物友善，可以帶埋毛孩一齊Chill住開餐！

人氣甜品！鮮奶麻糬窩夫

大大塊鮮奶麻糬放喺窩夫上面非常搶鏡。窩夫以日本抹茶粉製作，口感鬆軟帶抹茶清香。麻糬就用上3.6牛乳、日本麵粉等做成，軟綿Q軟。配搭紅豆、蛋白脆餅、豆漿忌廉、青檸雪芭、抹茶爆谷，組合非常豐富。會建議先食抹茶窩夫同麻糬嘅原味，再按喜好加配料。豆漿忌廉輕盈微甜，青檸雪芭為餐廳用天然青檸汁自家製作、酸甜有致，但略嫌配窩夫嘅時候會蓋過抹茶茶味。

每日新鮮製作手工意粉

另一餐廳用心菜式推介係手工意粉，廚師特別選用意大利00麵粉，顆粒幼細、令意粉口感特別滑溜，而且煮嘅時候唔易發漲，食落自然更有嚼勁。牛肉亦挑選肉質柔嫩、肉香濃郁嘅面頰肉，慢煮12小時再加上日式辣蕃茄汁，香氣誘人。彈牙寬帶麵掛上醬汁精華，啖啖滋味。

法式油浸鴨髀x日式班戟漢堡

呢度亦有唔同配搭嘅窩夫漢堡同班戟漢堡，好似呢份手撕慢煮法式油浸鴨髀班戟漢堡，鴨髀跟足法式做法，加橄欖油同香草慢煮24小時，再撕成肉絲加上其他配料。班戟當中加入紫菜碎同洋蔥，鬆軟中帶微微鹹香，整體味道豐富得嚟又好夾。

清爽輕食推介

色彩繽紛嘅沙律用上多款食材，彈牙嘅大蝦加上惹味嘅明太子，海鮮鹹香突出；味道較淡嘅藜麥同沙律菜加上橙肉同日式柚子醋汁，微酸清爽好醒胃。分量亦唔細，同好朋友分享最啱。

溫馨提示返大部分主食同甜品都係中午12點後供應，朝早去就可以試下餐廳自家烘焙嘅糕點，包括鬆餅(Muffin)、司康(Scone)、肉桂卷、香蕉麵包等。牛角酥選用日本同意大利嘅麵粉，加上澳洲牛油製作，口感酥脆富牛油香。

咖啡自選拼配或單品豆

咖啡選用荷蘭Manhattan Coffee Roasters嘅拼配同單品豆，House Blend為巴西同巴拿馬拼配，風味平衡口感Creamy。而兩款單品豆約一至兩個禮拜更換一次，採訪當日就係厭氧日曬嘅埃塞俄比亞豆同哥倫比亞豆，前者帶士多啤梨風味，後者就有紅桑子味道。

咖啡之外亦有奶昔、朱古力、抹茶等等，而熱嘅日本茶會以玻璃壺奉上。選用嚟自日本靜岡嘅玄米抹茶，茶湯翠綠清澈，回甘當中帶米香，味道怡人。

Ukiyo

地址：尖沙咀梳士巴利道18號維港文化匯K11 Musea 6樓610號舖

文：Cathy.H

相、片：Yan Yan