自細數口差 曾被騙酬勞 劉心悠蠢就要認 唔會扮勁

藝人劉心悠自嘲由細到大數口差，小時數學考試「捧蛋」，大時則懵盛盛被騙酬勞，但她不介意認蠢，更拒絕「冇料扮四條」。而吳若希表明明年會專注時間於家庭，有限度推歌，以平常心看待獎項。

港台創作總監馬浚偉昨日為主持及主創節目《知情識趣31》錄影，邀請好友劉心悠、吳若希（Jinny）、林奕匡及梅小青率先試玩「名人問答挑戰賽」及賽後劍球比試。馬浚偉笑言邀嘉賓時第一時間諗起心悠，因知道她一定答錯，零舍有節目效果。問到心悠可有信心？她自嘲：「唔識就要認，唔介意畀人覺得我好蠢！（有咩強項？）普通話或者動物題，最近養鸚鵡。」

酬勞幾多都唔知

她續謂中學時期讀數學最大心理壓力，試過考試零分，一講起數字就頭痛，笑問現時傾酬勞可有出錯？她自爆未有經理人之前經常計錯數，更試過被騙蝕錢：「睇少個零、簽錯支票都有！（涉及幾多位數字？）咁又唔係好大鑊嘅！」

自稱被大女傳染患重感冒的Jinny，嘲自己智慧欠奉，勝在有「考試命」。講到一對仔女，她直認明年將會是個大挑戰，因為大女要報考小學，希望留更多時間在家：「同公司傾好出歌係2首起、3首止，多就搞唔掂。」

吳若希睇淡Hana攞獎

講到樂壇頒獎禮，她睇好Gin Lee（李幸倪）攞《勁歌》的「最受歡迎女歌星」，卻非曾3奪殊榮的「死敵」Hana（菊梓喬）：「見Gin Lee同到歌神張學友合作，我都想同心目中嘅偶像鄧麗欣合作！」續爆入行初期曾向公司提議跟Hana合唱，但最後不了了之。