花姐處女下海客串《流水落花》感忐忑 MIRROR：做嚟畀我哋笑下好呀！

由鄭秀文（Sammi）、陸駿光及談善言主演嘅電影《流水落花》喺3月2日已經正式上映，MIRROR經理人黃慧君（花姐）亦為電影獻出第一次，喺節目中飾演士多老闆娘兼Sammi嘅好朋友，平日霸氣又mean爆嘅花姐，原來喺真正演出前都有忐忑及問MIRROR成員意見。

近日《流水落花》喺社交網站專頁上載花姐嘅幕後花絮，花姐就話佢將處女作獻咗畀Sammi，並話佢今次飾演一個士多老闆娘，係一個好直率及同Sammi識咗好耐嘅朋友。不過花姐就對導演搵佢飾演呢個角色有啲不解：「即係我估點解佢會搵我呢？九唔搭八咁樣、又未做過戲。咁我就估佢通常都係要搵一個粗魯、肥屍大隻嘅師奶，所以佢搵我囉。」 不過花姐睇完劇本就更加唔明導演點解會搵佢：「但係我睇完劇本之後，我覺得點解又會文縐縐咁，所以我嚟之前係好大壓力㗎！我好驚導演叫我做一個賢良淑德嘅高貴女人，咁我就死啦！」

喺真正演出之前，花姐原來都有忐忑及問MIRROR成員意見：「咁但係其實我應承嘅過程我係好忐忑嘅，我都有問MIRROR成員我係咪應該咁樣做嘅，但係佢哋都話：『咪做囉！你得閒咪做囉！ 』咁樣。」

唔少網民都對花姐今次客串《流水落花》表示好驚喜，並留言：「全場笑位就係花姐的出場」、「有驚喜呀」、「每次花姐出場，全場都笑得好開心」、「咦，有花姐反而多咗興趣睇」、「花姐做得好好，入型入格！」、「完全唔知你有份客串，好驚喜！Good job!」、「原本吾諗住睇，知道有花姐要去睇」及「琴晚去睇，最驚喜見到花姐，全場都即大笑」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！