萬千星輝頒獎典禮︳視帝十強得2個大熱 林敏驄大戰陳山聰

TVB《萬千星輝頒獎典禮2022》將於星期日舉行,每年焦點之一都係視帝視后(最佳男、女主角)誰屬。TVB早前公布今年視帝最後十強名單,分別係 -

丁子朗 《青春不要臉》

周嘉洛《痞子殿下》

郭晉安《回歸》

馬國明《白色強人II》

陳豪《白色強人II》

陳山聰《金宵大廈2》

陳展鵬《超能使者》

林敏驄《下流上車族》

黃宗澤《法證先鋒V》

黎耀祥《輕.功》

雖則話有十強,但部份入圍者明顯係陪跑 - 新生代嘅丁子朗同周嘉洛年資尚淺,排資論輩以至劇中表現都未夠說服力。

痞子殿下 周嘉洛
痞子殿下 周嘉洛
青春不要臉
青春不要臉

另一梯隊係一眾作品存在感唔強嘅高年資男藝員,例如陳豪、馬國明、郭晉安同黃宗澤。佢地4個都交出正常水準,但劇集播出時反應平平,亦無任何可以cap出嚟討論嘅段落製造聲勢,難以爭獎。

超能使者
超能使者

另外2位係honourable mention,即係無獎但值得表揚嘅競爭者。過去幾年未受熱捧嘅陳展鵬,其實都算唔話得,3年冇劇出街之後《逆天奇案》成為年度收視之冠,《童時愛上你》做男二托起張振朗,而入圍作《超能使者》雖然係倉底貨,但劇中好幾場慘爆戲份都引起到一定討論,計落隨時係黑馬添。不過再拎多次對煎pang有幾大幫助?都可能係內部考慮因素之一。

輕.功 劇情︳唔係古裝武俠劇 溫情劇+黎耀祥啱晒大齡觀眾
輕.功 劇情︳唔係古裝武俠劇 溫情劇+黎耀祥啱晒大齡觀眾

而黎耀祥喺《輕.功》首次演「老生」角色,仔女都廿幾嗰隻,睇落同過去一段時間要佢中年人做後生事嘅角設順眼得多。只可惜劇集聲勢真係太弱,而且拎第4次視帝都只係錦上添花而已。

下流上車族︳林敏驄
下流上車族︳林敏驄
下流上車族︳林敏驄
下流上車族︳林敏驄

好嘞,兩大熱門即係陳山聰同林敏驄。首次拍劇嘅林敏驄,論《下流上車族》反應同網絡熱度,絕對贏晒;以演技計,大師展現出「TVB式演出」以外另一種表現,自然流暢地爆肚,合情合理嘅嚎哭,同劇中老婆囡囡嘅默契互動,都係眼前一亮,甚至可以話係年度最佳。加上由林敏驄得獎,網上聲量一定爆,仲可以鋪定路日後更多合作。

金宵大廈2
金宵大廈2

至於陳山聰,根本《金宵大廈》嗰年就應該攻頂,只不過對手係提名視帝12次嘅馬國明,頭先都提過排資論輩嘅重要,所以輸得合理,而身為TVB親生仔嘅山聰,今次亦時機成熟再上一層樓。《金宵2》入面山聰要演3個角色,難度不少,而且山聰近年成功洗刷負面印象,得獎同樣有話題性,視帝榮譽對發展亦有幫助,似乎勝算比較大。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!