蓮香樓結業︳影視取景勝地 《去年煙花特別多》靚仔劈友戲最激

中環老牌茶樓蓮香樓嘅經營者喺facebook出post，宣布因為「敵不過疫情」而要結業，令唔少港人深感惋惜。

香港蓮香樓已經有過百年歷史，現址位於中環威靈頓街，由於裝修保持舊式茶樓特色，唔少香港影視作品都喺度取景。廿多年前王家衛導演嘅懷舊作品《花樣年華》就喺蓮香樓舉行開鏡記者會，男女主角梁朝偉同張曼玉仲以60年代造型示人。而TVB好多飲食資訊節目當然都有嚟過拍攝，劇集《愛我請留言》都喺度取景。

至於電影，2008年上映嘅《愛情萬歲》入面，洪卓立嘅角色就係喺蓮香樓做外賣仔，最後仲同女神Yumiko（鄭希怡）喺蓮香樓再遇。但係講到最激都係1998年陳果導演嘅作品《去年煙花特別多》。戲中飾演退役華籍英兵嘅何華超，因為回歸而被遣散，生計成問題，滿腔怒火嘅佢最後喺蓮香樓遇到一班少年講數，佢地最終劈友收場，而何華超亦因此大爆發，追斬其中一個少年。最後何華超更喺中環街頭被槍殺，成場戲展現香港特色之餘亦十分有火氣，令觀眾印象難忘。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！