蘭茜復出拍廣告展現成熟知性美 回應嫁富商傳聞：我未結過婚

前DJ蘭茜（簡詠嫻）當年憑無綫綜藝節目《獎門人》入屋，佢因用牙齒極速刨西瓜，而有「西瓜刨」之稱，佢喺節目中嘅搞笑形象令佢多咗好多工作機會，但同時「醜女」形象亦深入民心。蘭茜退出娛樂圈多年，上年以藝術家身分開設個人書畫展，留有長髮嘅蘭茜打扮充滿氣質，而且仲多咗份成熟知性美。今年3月，佢為ViuTV拍攝嘅劇集《940920》播出，雖然只係客串，不過已經令唔少觀眾感到驚喜。去到近日，佢再有復出嘅動作，就係接拍護髮產品廣告。

據講今次品牌睇中佢轉型藝術家嘅一面，喺廣告中佢穿上白色長裙，並展露其書法及茶道嘅興緻和手藝，同以前嘅巴喳搞笑形象截然不同。喺接受傳媒訪問時，佢就話係每個人嘅成長經歷，自己冇刻意做啲咩嘢，佢認為活到一定嘅年紀就會隨心而發，同埋希望可以喺人生中成就自己追求嘅嘢，而佢而家就係做緊自己鍾意嘅嘢。

蘭茜喺退出娛樂圈後加入公關行列，後來重返校園，於中文大學修讀人類學系碩士課程。另外，佢亦喜愛畫水墨畫，本身對畫畫有研究嘅佢，作品都曾經參展過唔同嘅展覽，更係香港書畫學會及香港婦女文化藝術協會嘅執委。早前一直有指一向感情低調嘅佢，淡出娛樂圈後與圈外富貴男友Johnny Cheung低調結婚，空閒時佢鍾意去古董店尋寶。佢喺接受傳媒訪問時就話多謝大家嘅祝福，不過其實佢係未結過婚，同埋佢非常享受一個人嘅精彩生活。被問到點解唔澄清時，佢就話唔係事實，所以佢覺得唔需要回應。

另外，變靚咗嘅蘭茜被問到有冇整容「加工」，佢就話要多謝佢嘅牙醫，同埋佢覺得大家內心美麗，所以睇佢而家靚咗。佢仲話以前嘅佢都係佢，不過嗰時佢年紀細鍾意玩，而當時亦用呢個方法去表述自己，而今日嘅佢就可能係同文字、畫作，用書法同大家溝通，可能因為呢個原因大家覺得比較有新鮮感。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！