螢幕CP想踩入電影圈 魏浚笙唔怕對厭袁澧林

魏浚笙戴錶講求款式,袁澧林則着重實用性。
魏浚笙戴錶講求款式,袁澧林則着重實用性。

最新螢幕CP魏浚笙與袁澧林昨日拍住上出席腕錶品牌活動,男方笑言不怕對到厭,希望與袁澧林有機會在電影中合作,實行衝出公仔箱!同場的吳海昕表示首次打工時,收過爸爸送的腕錶作禮物,提醒她要準時上班。

魏浚笙(Jeffrey)、袁澧林(Angela)、吳海昕、王智騫與范麒智,昨日出席Breitling百年靈Superocean超級海洋腕錶新品發布會,Angela以露臍裝上陣大晒小蠻腰。提到Jeffrey與Angela頻頻孖住出活動,Jeffrey感謝品牌給予機會,又指不會對厭女方:「大家合作得好開心,最想一齊合作拍電影同電視劇,作為新人想多啲演出機會。」提起手錶,2人異口同聲表示會用手錶來配襯不同服裝,問到Jeffrey會否佩戴情侶錶?他表示:「少啲,我戴錶係睇個人心情,從顏色着手。(有冇收藏手錶?)我會儲唔同顏色嘅手錶。」Angela買錶則講求實用性:「因為我比較鍾意做運動,可以潛水嘅錶會成為我嘅收藏。(有冇送錶畀男仔?)冇,我亦冇收過男仔送錶,希望有人送畀我,令我再準時啲。我唔係遲到王,工作唔會遲到,但化妝會遲。」

提到MIRROR演唱會前晚發生意外,Angela透露當時在場欣賞個唱:「希望受傷嘅舞蹈員快啲好番,我諗香港人最希望佢哋早日康復,其他就唔講太多。(你當時心情點?)我嘅心情唔重要,希望佢哋盡快康復。」而Jeffrey叫大家為受傷的舞蹈員集氣及祈禱。

吳海昕戴錶 提醒準時返工

吳海昕透露最喜歡的一枚手錶是由爸爸所送:「啲人問我收過最貴重嘅係咩手錶,我答永遠都係爸爸送嗰隻,因為個價值在於佢份心意。我18歲第一次做暑期工,爸爸送咗隻錶畀我,要我準時返工。」對於有份演出的ViuTV劇集《I SWIM》結局被網民狠批,她稱有聆聽網民意見,會努力改善,自問當時已盡力演出。她透露最近忙於綵排舞台劇:「我係第一次做,唔知道原來要花咁多時間排練,忙到連阿媽都冇時間見。(做舞台劇會唔會留意舞台安全問題?)我仲未踏台板,我哋個舞台設計相對簡單,但都會打醒十二分精神。」

范麒智(左起)、袁澧林、魏浚笙、吳海昕與王智騫齊齊出席活動搵真銀。
范麒智(左起)、袁澧林、魏浚笙、吳海昕與王智騫齊齊出席活動搵真銀。
吳海昕透露將演出舞台劇。
吳海昕透露將演出舞台劇。