袁澧林嫌靚得過分 魏浚笙喜感入骨 周星馳上身

男神魏浚笙在最近熱播的青春游水劇中表現生鬼，備受讚賞，原來他是周星馳的鐵粉，更指其中一幕審問戲不自覺把《食神》的神髓投入其中。至於文青女神袁澧林面對靚仔又健碩的拍檔，卻明言不過電，全因對方靚得過分、太過完美！

魏浚笙（Jeffrey）與袁澧林（Angela）在ViuTV新劇《I SWIM》演一對，當中一場水底跳舞戲極為浪漫，但浪漫背後其實相當辛苦。Jeffrey指當日早上已拍了游水戲當熱身，但晚上再落水時冷得難以呼吸，幾乎昏迷！Angela亦表示凍到肺活量大減，水中活動能力只剩三成：「我來回水底6次，因為唔可以連續浸凍水超過20分鐘，如果唔係就要叫白車！」他們感謝劇組準備熱薑茶及為他們照燈保暖，Jeffrey又說：「我睇咗回帶係幾浪漫，兩小無猜嘅感覺。（女友覺得點？）係經理人，覺得好好，估唔到同Angela咁夾，有CP感。」他指2人之前曾合作拍攝時裝專輯，留有印象：「第一次見Angela時，我覺得自己好細個，但拍完《I SWIM》佢後生咗好多，定係我變老積咗？」

落閘不過電

Angela直指Jeffrey並非她杯茶：「因為佢個樣太完美，我講真，好在佢有女朋友，其他女仔唔會埋身，如果唔係肯定會惹好多狂蜂浪蝶，咁靚仔係好麻煩！我都鍾意靚仔，但佢有啲過激。有次同工作人員傾偈，佢哋話其他男仔應該唔會妒忌Jeffrey，因為距離實在拉得太遠。」Jeffrey聞言連聲否認，並以周星馳的腔調說：「小弟『笨』唔係一個靚仔，係一位專業演員。」他希望挑戰反差較大的角色，不介意扮醜演流浪漢，認為作為新人，要謙卑學習才能走到更遠的路。

Jeffrey自認周星馳迷，覺得自己無論說話及喜好，都深受影響，間中還會用周星馳的電影對白對答，又自爆將精髓帶入劇中：「我以為施詠係我班男仔假扮，我逐個審問佢哋時，突然《食神》上身，將對白加強咗！」笑言若有生之年能向周星馳學習，就死而無憾。