被周嘉洛笑「狗樣」 林夏薇3愛犬攬住瞓 老公讓路

天氣炎熱,林夏薇細心地為狗狗遮太陽,又不時關心牠有否不適。
天氣炎熱,林夏薇細心地為狗狗遮太陽,又不時關心牠有否不適。

視后林夏薇向來是愛狗之人,近日在新劇與狗狗有大量對手戲,為免酷熱天氣令狗狗不適中暑,除出動雨傘為牠擋太陽,又放冰粒於牠的耳朵及鼻樑降溫,寧願自己暴曬,認真唔話得!

林夏薇與周嘉洛昨日為無綫新劇《寵愛Pet Pet》拍攝一場感情大躍進戲份,在此之前,薇薇先跟劇中愛犬「冬甩」拍攝獨白戲。場地烈日當空無遮無擋,穿上長袖戲服的演員苦不堪言,連狗狗亦要瞓冰墊及食冰粒降溫,工作人員又讓牠在水池休息,見狗狗趴低,薇薇即拿起冰塊放在其耳朵及鼻樑,又出動雨傘為牠遮太陽,非常細心。

日夜開工少見面

家有3隻愛犬的薇薇最近日以繼夜開工,笑言每次返家,愛犬都黐實唔放:「套劇令我返到屋企更加親近狗狗,非常掛住佢哋,狗狗都一樣,連我坐按摩椅同瞓都要攬住,明明之前佢哋好Cool又有性格㗎!」在旁的嘉洛即取笑:「唔怪得你個樣愈嚟愈似狗啦!」薇薇不甘示弱反擊:「彼此彼此啫!」狗狗如此黐身,問老公可有詐型?薇薇說:「唔會,佢會讓位,爭寵係另一樣,早兩日打風,我約咗好耐冇見嘅朋友聚吓冇陪佢,但佢後來都有出嚟Join。」

至於嘉洛透露家中有一隻11歲玩具貴婦狗,由牠幾個月大開始養,隨着狗狗年紀漸長,他坦言感觸甚深:「因為好少時間陪佢,依家會少啲約朋友,寧願留喺屋企。(有冇難忘事?)佢同我都唔鍾意去街,每次帶佢落街,唔夠15分鐘就扭抱,好嗲!依家年紀大都冇咩病痛,係關節同白內障問題。(養多隻狗陪佢?)應該唔會,依家狗狗由媽咪照顧,唔想佢太辛苦。」

周嘉洛與林夏薇互相取笑愈來愈似狗。
周嘉洛與林夏薇互相取笑愈來愈似狗。