被大劉寸造謠呃like 蕭若元拍片反駁︰劉鑾雄已經冇新聞價值

早前網上流傳片段拍到富商劉鑾雄(大劉)現身旗下商場,而身旁女子正是舊愛呂麗君,令人聯想到二人係咪已經破冰。大劉事後發聲明之餘,更於前日召開記者會交代。不過大劉有問必答之餘仲回應唔少關於佢嘅「都市傳聞」。近年主力拍網上評論片嘅蕭若元,曾經喺節目談論大劉短片,表示雙方認識多年。大劉喺記者會亦有提及蕭若元,直言「同佢唔熟」,仲話蕭生「佢搵到食使乜咁吖...如果我有一日要喺平台咁呃like呀,我就大乜鑊啦」、「講嚟講去都係作」。

被大劉寸造謠呃like 蕭若元拍片反駁︰劉鑾雄已經冇新聞價值
被大劉寸造謠呃like 蕭若元拍片反駁︰劉鑾雄已經冇新聞價值

當事人蕭若元亦不甘示弱,好快就喺自己youtube channel拍片回應。蕭若元重申80年代已經認識劉鑾雄,仲曾經喺1998年亞洲金融風暴時一齊睇住政府入市打大鱷。蕭生曾經話大劉有躁狂症但被對方否認,蕭就解釋「我所謂躁狂係個人成日發脾氣,脾氣好猛烈,去到不能自控而發得比較多」,又話「如果有醫生證明你真係冇躁狂症,咁叫醫生寫封信俾我,我咪道歉,好簡單」。

對於被寸呃like搵食,蕭若元回應時似乎早有準備,拎定數據出嚟,指出去年個人頻道嘅影片當中,關於大劉嘅收看次數排第20,而日前首次評論大劉喺商場鬧人嘅片,播放數甚至唔夠評論肥媽條片咁多,直言「講佢(大劉)唔會令到view數增加,一般而言劉鑾雄已經冇新聞價值,因為佢已退出江湖咁耐」。

大劉喺記者會大爆蕭生靠拍片每月有十幾廿萬收入,蕭就反擊「劉生嘅新聞唔會增加我嘅like同收入……唔好以為有錢人大晒,歷史上有錢人喺社會冇乜地位」。記者會上有人叫劉鑾雄開youtube channel,觀乎嗰日記者會嘅表現,一旦開台的話,最開心嘅相信係一眾要日日搵話題嘅KOL,唔愁冇嘢講。

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!