被禁與李佳芯合照辣㷫「蟲草大王」陳恩德 TVB千萬廣告今日起轉落ViuTV

李佳芯（Ali）上年與拍拖7年陳炳銓分手後，與「蟲草大王」陳恩德傳出緋聞，更流出多張合照與「男友視角」照片，不過李佳芯多次否認，日前亦發聲明表明二人過去見面都係洽談工作合作，強調與對方今後都唔會有任何發展空間；26日更缺席陳恩德公司舉辦嘅「Pet Paws NFT發佈會」，不過陳恩德就指係佢自己決定李佳芯唔洗出席，同時抽起喺無綫落嘅所有廣告。

當日發佈會嘉賓變成王丹妮、羅孝勇及有「翻版Ali」之稱嘅蔡潔，陳恩德表示收到李佳芯經理人通知，指活動期間不能與李佳芯單獨合照及需保持距離，對此條件感到侮辱所以唔洗李佳芯出席，一怒之下揚言會抽起晒無綫啲廣告，並要求樂易玲交代：「每年仲會喺佢嗰度落接近兩千萬廣告嘅客戶又有幾多個，真係唔明點解對我哋公司態度咁差，我要話畀佢知我唔好蝦。」

有指陳恩德與無綫投訴得唔到滿意答覆；樂易玲亦就此事回應傳媒，指經理人基本責任係保護和尊重藝人意願為先，未知係咪呢句再辣㷫陳恩德，令佢決定正式抽起所有廣告中止合作，有關廣告於噚日（30日）最後一日喺無綫播放，並由今日（31日）起改成喺ViuTV落廣告，預計農曆新年開始就會喺ViuTV見到一連串陳恩德旗下集團嘅賀年廣告，有網民就留言表示，真係成日喺無綫見到佢嘅廣告，指今次無綫大獲，而ViuTV就真係笑到最後咁話。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！