被「恐嚇」着白色泳褲 姜濤驚青 怕露士啤胎

本報昨日率先爆ViuTV將「跟隊」舉行星級版「港奧運動會」，MIRROR成員姜濤、Jer提起要着泳褲打水戰即耍手擰頭，經理人花姐「恐嚇」要着白色泳褲，嚇得姜濤急急讓步，場面爆笑！

人氣男團MIRROR成員姜濤及Jer，昨日偕林家謙、饒舌歌手Tyson Yoshi出席拉闊音樂會記者會，問到屆時會否騷肌派福利，Jer對姜濤說：「你騷我就騷！」姜濤即反白眼說：「我怕嚇親大家，有能力都會騷嘅，或者騷鎖骨。（咁錫身？）係為大家眼睛着想。」

Jer自認保守

講到ViuTV將配合東京奧運製作一系列運動比賽節目，姜濤表示剛剛才得悉，但一聽到要着泳褲晒「鵰」即勁大反應話好介意︰「花姐唔會畀呢件事發生！我怕着咗，公司要同我解約！（Fans想睇你着。）過唔到內心嗰關，身材唔好，有士啤胎！」此時，花姐突入奸笑加把口：「唔記得同你講，唔止着泳褲，仲要係白色！」嚇到姜濤O晒嘴，急急放寬底線：「平腳都得嘅……或者着潛水衣。」Jer則自稱保守派，不會輕易着泳褲。

另外，提起有「鏡粉」的另一半在社交平台開設「苦主群組」，出Post「公審」枕邊人的追星行為，2人呼籲女Fans不要強迫另一半，不希望因而影響關係。