推介時令蛋糕+酒釀手工芋圓 西營盤新開復古風甜品Cafe

想喺午後忙裡偷閒，食份手工芋圓、蛋糕或者飲杯咖啡嘅話，西營盤呢間新開嘅甜品Cafe就最啱喇。由人氣蛋糕網店起家，每日供應唔同口味嘅卷蛋、戚風三文治、芝士蛋糕等，亦有台灣直送嘅手工芋圓，大粒煙韌配埋酒釀味道有驚喜！飲品亦唔馬虎，可以試單品咖啡或者即打木瓜牛乳啊。

「睡飽吃吃」位於港鐵西營盤站附近，樓高兩層，裝修走復古木系風格，有啲似台灣嘅老宅咖啡廳或者日本嘅喫茶店。從網店流浪甜點工作室起家，不過店主指其實佢本身係先學咖啡再學甜品，希望呢度唔單止係甜點工作室嘅實體店，更可以係一個畀大家享受同休憩嘅Cafe。

每日限定 時令口味甜點

是日甜品會有兩至三款選擇，到訪呢日就有呢款星野抹茶生乳卷。店主指因為想試下唔同嘅抹茶粉，就直接同日本福岡嘅星野製茶園入貨，佢哋嘅抹茶茶香突出而唔會太澀，味道平衡。特別係製作成生乳卷，中間抹茶忌廉嘅微甜帶出抹茶粉嘅旨味，蛋糕口感亦非常鬆軟。上面係日本豆腐，打成蓉口感綿滑，但比一般忌廉清爽，配生乳卷啱啱好。

芝麻巴斯克蛋糕做到軟心效果，食落先有芝麻嘅陣陣香氣，中間係Cream Cheese嘅微酸，最後係蛋糕嘅甜味。加埋有淡淡紅棗甜味嘅忌廉，令味道層次更為豐富。原來店主創作呢個組合嘅靈感係嚟自糖水，成個配搭都幾養生Feel。

是日甜品全部都係小店自家新鮮製作，選用日本雞蛋、麵粉同糖，有機會係卷蛋、戚風三文治、芝士蛋糕、布丁甚至係肉桂卷。卷蛋通常會用時令食材，例如之前就出過巧克力呂宋芒卷蛋、大甲芋泥生乳卷等等。

台灣直送 大粒煙韌手工芋圓

店主喺台灣食過比較大粒煙韌嘅芋圓，有見香港賣嘅通常都係中等大細，就直接從台灣訂購新鮮直送手工製大粒芋圓！三色芋圓分別用咗大甲芋頭、台農66地瓜、嘉義紫薯，大粒啲食落的確更有咬口，外面軟滑裡面有顆粒感，越嚼芋頭同地瓜嘅甜香就越出。

芋圓配搭酒釀、豆花同豆漿，酒釀同樣嚟自台灣，酒香同甜味平衡、帶微酸。豆腐花就係自家新鮮製，口感綿密。（補充返因為拍攝想睇清楚配料，所以開飯仔請店主將豆漿同酒釀分開上，平時出餐係會一齊上嘅。）

飲品推介 SOE咖啡+木瓜牛乳

甜品出色之餘咖啡亦有水準，單品咖啡豆係本地咖啡烘焙商向巴西西部一間咖啡莊園直接貿易購入，比一般嚟自巴西中南部嘅豆Body更厚而且更甜，風味亦更為平衡，入口微酸、之後偏堅果風味。

呢度亦有花茶、果茶同台灣古早味飲品，例如呢杯即叫即打嘅木瓜牛乳，因為無加到冰所以飲落特別濃郁綿滑，啖啖都係木瓜甜香！店主表示秘訣在於要去街市買新鮮木瓜，然後放到夠熟先可以用。提醒大家木瓜牛乳建議喺15分鐘之內飲完，皆因木瓜酵素會分解蛋白質，擺得太耐會凝固兼變苦啊。

睡飽吃吃

地址：西環皇后大道西368號地舖

*設最低消費：星期一至五每人一杯飲品（不包括甜品），星期六日及公眾假期每人一杯飲品及一份甜品。如客滿有人候位，內用限時75分鐘。

文：Cathy.H

相：Michael