譚俊彥老婆任祉妍係戲劇學院高材生 為家庭放棄幕前事業

入行21年嘅譚俊彥(Shawn)憑《換命真相》成為新科視帝，原來得獎當日正係佢同太太任祉妍結婚7周年紀念日。婚後嘅Shawn零緋聞兼且以家庭為重，而本身係學院派演員嘅任祉妍就專心照顧小朋友，兩公婆一齊為頭家付出，令人羨慕。

任祉妍係內地遼寧人，喺北京讀完高中就去咗新加坡讀戲劇，成績相當突出，年年都拎到獎學金，仲以第一名成績畢業。任祉妍後來返內地發展，正正因為拍劇而認識譚俊彥。Shawn受訪時提到佢地一齊喺新彊拍劇，有一晚喺星空下向任祉妍表白但被拒，後來Shawn為咗俾多啲時間互相了解，仲搬到北京住咗一年，終於打動芳心。

佢地拍拖大約一年後就奉女成婚，2015年大女譚晴出世，2017年再誕下細仔。婚後任祉妍拎住四箱行李跟譚俊彥返香港生活，並且冇再參與幕前演出，而Shawn就為頭家留港發展，加入TVB重新出發。

譚俊彥提過，受過正統戲劇訓練嘅太太會為自己嘅演出俾評語，如果拍劇遇著重頭戲更加會叫埋太太去現場睇實。有高手指導，難怪譚俊彥得獎後喺台上同太太講「你係我全部，冇咗你，我唔會攞到呢個獎」！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！