賴慰玲忙做「女一」 馮盈盈頂檔做主持 直認冇劇拍

馮盈盈是上季《好聲好戲》的參賽者,如今「升呢」做主持。
馮盈盈是上季《好聲好戲》的參賽者,如今「升呢」做主持。

藝人馮盈盈「升呢」成為新一季《好聲好戲》主持,對於被指取代上季的賴慰玲,盈盈一臉尷尬,急忙向路過的阮兆祥求救。談及「解凍」後仍未復出拍劇,她辯稱暫時忙於「取經」增值。

無綫節目《好聲好戲》新一季開鑼,前晚在電視城進行錄影,汪明荃繼續擔任主席評判之一,主持阮兆祥冧莊,但拍檔由去年的賴慰玲換成馮盈盈,參賽者包括袁偉豪等,場面熱鬧。

盈盈由去年參賽搖身一變當上主持,她說:「評判對參賽者嘅批評一針見血,我可以用過來人身份去潤飾件事。」記者打趣指她取代賴慰玲,路過的阮兆祥幫手解圍:「賴慰玲去咗做女一(拍劇),問過戲劇組唔可以放人,希望佢同陳自瑤可以用特別嘉賓身份亮相吓。」盈盈有3個綜藝節目在手,但仍未獲安排拍劇,她承認對上一套劇已是《智能愛人》,問何時真正「融雪」,她說:「有3個節目喺手,呢個論點好難成立喎!今次有咁多前輩喺度,我當學嘢。」

袁偉豪由頭做「新丁」

早前因負評纏身而情緒受影響的袁偉豪,終於擺脫陰霾,昨日容光煥發現身,他說:「今次我放低身段,由零開始去學習。頭先錄影咗一部分,覺得表現差,好應該接受批評,咪當重新考驗自己,希望嚟緊可以為動畫配音。」又打趣表示希望像上一季冠軍陳自瑤般,完騷後工作接踵而來。

同場的宋宛穎談及新一屆港姐面試,她說:「佢哋質素好高,幾好條件,希望嚟緊有機會交流。(卸任好唔捨得?)都會,時間過得好快。」

馮盈盈被問到口啞啞,急向阮兆祥求救。
馮盈盈被問到口啞啞,急向阮兆祥求救。
袁偉豪自認配音表現差,要由零開始學習。
袁偉豪自認配音表現差,要由零開始學習。
宋宛穎希望與新一屆港姐交流。
宋宛穎希望與新一屆港姐交流。