雅虎香港新聞 日本赤身燒肉專門店登陸中環 稀有部位廚師發辦 牛柳芯/友三角肉香濃郁
掛住日本有好多方法止渴，其中一個當然就係去日本過江龍店，感受最接近當地嘅味道啦。最近有間嚟自日本福岡嘅新派燒肉專門店登陸中環，主打全港獨家供應嘅日本鹿兒島新村畜產農場直送嘅「新村和牛」，並引入日本時下人氣高企嘅「赤身燒肉」熱潮。
新店來勢洶洶，係品牌首間海外旗艦店，更有由日本派駐嘅日籍廚師駐守，因應和牛部位、根據紋路自創切割手法。走在潮流尖啄嘅牛魔王，應該會知道日本而家興食赤身燒肉。赤身肉即係紅肉或瘦肉咁解，赤身燒肉就係切割時，脂肪相對較少嘅部位，同平時食開嘅「霜降」剛好相反。不過，雖然話赤身肉瘦啲，但同樣都擁有豐富嘅油花，而且肉質細緻，肉味濃郁。
嚟到梗係要試多幾款唔同部位啦，特別係坊間少見嘅稀有部位就更加唔好錯過。識揀一定揀主廚發辦嘅招牌組合「赤身和牛7 款盛合（1 切）」，一次過食晒7個部位。肩三角口感較為煙韌少少，帶有嚼勁，加埋紫菜 wasabi 一齊食更可增加肉香。 上後腰脊肉係較少活動嘅部位，肉質亦會較腍身 ，而肉味就再濃少少。
友三角係開飯仔嘅飛佛之一，呢個部位嘅油脂較多，入口近乎即溶。而因解體時形狀似龜甲而被稱為龜之甲呢個位置，就啖啖都係甘甜嘅肉香。
另可亦可點選廚師發辦套餐呀，除咗有特選／赤身和牛鹽燒及醬燒各三款外，仲有唔嗌套餐都要單點嘅必食和牛西冷壽喜燒、咖喱和牛飯同甜品。和牛西冷壽喜燒絕對可以話係全餐嘅亮點，西冷薄切，沾點醬汁後輕輕快燒兩面，點埋日本蛋黃就食得，蛋香濃郁但又唔會蓋過咗牛嘅肉香，平衡剛好，西冷大大塊，有油香又鬆軟，點埋蛋食就滑上加滑。
食呢個餐記得特別要mark實牛柳芯呀，係牛柳最中間嘅部位，即稀有又好食，肉質腍香軟滑，肉味濃郁，點埋師傅特調嘅洋蔥蘋果扒汁，酸酸甜甜可中和肉香，而即場刨喺面嘅松露反而味道冇想像中咁濃喇。
地址: 中環威靈頓街2-8號威靈頓廣場地舖
文、相、片：Kar
