造星3亞軍陳葦璇簽環球現身TVB 網民：搏返大陸好似曾比特咁

《全民造星III》亞軍陳葦璇（Kira），喺比賽完結後參與唔少ViuTV節目拍攝，例如《囝囝女女730》、《今餐有料到》及《肥美人》等等。不過喺前日（15日）陳葦璇突然現身TVB記者會，原來佢已經同ViuTV完約，仲啱啱加盟環球唱片，喺公司安排下亮相TVB。

陳葦璇喺前日突然現身TVB《善心滿載仁愛堂》記者會，唔少傳媒都紛紛追問佢，佢就話同ViuTV已經完約，而簽約環球唱片係因為想開演唱會。被問到會唔會尷尬，佢就話唔會，因為佢一直都好想喺唔同嘅平台演唱自己嘅作品，嚟緊喺《善心滿載仁愛堂》仲會同施匡翹和黃奕斌等歌手表演跳唱串燒歌。

而同樣憑《全民造星III》彈起嘅Bingo隊長「卡文」關嘉敏（Carman），上年簽約加入邵氏成為旗下藝人，唔少網民不滿卡文倒戈，而紛紛留言大鬧及指對佢失望。陳葦璇就表示唔怕被罵，因為粉絲好支持佢去唔同嘅音樂平台，另外佢仲話同卡文係有分別，因為佢只係想專注喺音樂方面，想出多啲歌，而佢嘅終極目標就係開個人演唱會。

陳葦璇現身TVB記者會後，隨即引起網民熱烈討論，除咗話佢變節之外，仲估計佢係想做曾比特2.0北上發展，例如：「搏返大陸好似曾比特咁」、「過多兩日開個小紅書，上大陸登台唱兩咀，你睇個爆炸頭咪又係咁」、「佢唔返大陸真係冇計 係香港0觀眾緣」、「千祈唔好做另一個比特「幣」」、「借TVB做跳板啫，終極北上搵食」及「大台係踏腳石啫，睇住曾比特上一個節目就紅咗，仲怕乜外界壓力呀？」等等。仲有網民認為佢無觀眾緣，去邊個台都係一樣，留言話「紅唔起 去Cctvb就會紅得起？」、「都預左 佢留起viu一定唔會紅 去環球做歌手好正常」及「見到佢就想熄電視，無觀眾緣，要紅都紅左啦」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！