連場動作戲鬥搏命 讚陳偉霆叉爆電 張家輝自嘲遲鈍

影帝張家輝與型男陳偉霆在英皇新片有連場動作戲，2人互笠高帽，家輝大讚陳偉霆身手敏捷，陳偉霆反讚他負傷仍頂硬上完成戲份，非常敬業。他早於9年前已封對方為偶像，可謂獨具慧眼！

耗資逾2億元的英皇電影《爆裂點》昨日在中環開工，主角張家輝、陳偉霆、譚俊彥、楊祐寧等均有現身，雖然天氣不穩下大雨，但無阻眾人氣勢，老闆楊受成亦專程前來探班。

片中不乏對手戲的家輝與陳偉霆，甫見面即互笠高帽，家輝大讚陳偉霆身手敏捷，拍打戲像電動車叉滿電：「佢敏捷過依家嘅我，我當年都好敏捷，依家就遲鈍咗啲！」談到早前拍跳天橋戲拗柴，他表示事發2星期仍未完全康復，拍跑戲及打戲要就住力。

親身拍打戲唔衰得

而久未拍港片的陳偉霆表示感覺舒服，因幾個月來只專心一套戲，他指拍攝初期家輝不了解他，遇上高難度場口時，不時問他能否應付：「我唔衰得畀佢睇，所以演出時要搏命，大部分動作戲都盡量自己做。」又指家輝受傷當日本不用上場，但仍願意試跳，第一Take順利通過，至第二Take才受傷，但仍堅持完成當日戲份。問是否封家輝為偶像？他說：「一直都係，我喺2013年都出Po講過。」對於為該片推掉不少內地工作，他揚言不能用錢衡量，而問到與超模何穗拍拖的傳聞，他不斷以專心工作回應，又笑說：「我同阿媽拍拖，擺阿媽上枱。」

已7年沒拍電影的視帝譚俊彥，感覺既新鮮又熟悉，飾演奸角的他，留鬚造型已維持了幾個月，加上要曬黑，以致現身兒子的小一面試時嚇親老師：「成個毒梟咁，都真係幾驚！（好多打戲？）我幾乎全部係打戲，有場戲同黃又南打，佢都食得好勁。（受傷？）大家都有，但都係皮外傷。」