郭富城「床戰」林家棟 出真力驚撞親

城城與同是電影發燒友的家棟分享導演夢。
城城與同是電影發燒友的家棟分享導演夢。

郭富城與林家棟兩位影帝出名搏盡,在新戲打到飛起,城城親身上陣作高空拍攝,家棟則負傷肉搏,足見對電影業的熱誠。城城更自爆已有全盤大計,希望「登6」前圓夢,一嘗執導筒滋味。

郭富城與林家棟早前為電影《斷網》接受訪問,分享拍攝點滴,戲中城城透過網絡與黑客搏鬥,和家棟派來追捕的殺手展開連場打鬥,拳拳到肉絕不輕鬆!他表示今次是繼《西遊記之孫悟空三打白骨精》後打得最多的一部戲,而且全部親身上陣:「喺中環追逐嗰場戲打足7日。(有冇受傷?)周身瘀就在所難免,《斷網》係真打,絕無花巧,頭兩日真係唔適應,要跳牆同喺棚架上打,有做足保護措施墊晒Pad。」

望「登6」前執導筒

談到戲中一幕在狹窄房間床下底埋身肉搏,2人大呻又熱又逼,家棟更是赴傷上陣:「前一晚拍另一套戲整傷個鼻腫晒,同事叫我影張相畀監製鄭保瑞睇話取消,我話『你信我啦唔會㗎,因為係鄭保瑞,一樣會叫我開工』,結果佢真係覆話諗到點拍,叫我過去。」城城補充:「地方實在太狹窄,只夠我哋兩個演員同一個攝影師,又要搶對方支槍,又要用真力,好驚撞到佢。」問到是否一Take完成?家棟笑說:「梗係唔會,鄭保瑞呀!」

家棟表示與城城都是電影發燒友,經常談論電影,更大爆對方想做導演,城城亦直認已有全盤大計:「諗咗8年,已經度好劇本,係講復仇,有友情、愛情同親情,當然亦會有動作,或者自導自演,希望60歲前圓夢。」

林家棟
林家棟
講起連場肉搏,城城與家棟不禁手舞足蹈。
講起連場肉搏,城城與家棟不禁手舞足蹈。