鄧梓峰大女擔任活動模特兒 從事攝影師平日愛影爸爸：唔使影都似巴斯光年

鄧梓峰與太太相愛40年，育有兩女兩子，除咗幼女未大學畢業，其他仔女都已經讀完大學，27歲大女鄧瓊芝（Natalie）2017年大學畢業後仲做埋攝影師，身形高挑嘅佢不時喺IG大曬靚相；日前，鄧瓊芝就以一身Deep V黑色性感晚裝出席前落選港姐代蓮曦丹美（Daisy）個人珠寶品牌活動。

鄧梓峰家境不俗，父親鄧廷琮經營空運及海運業務，大哥鄧小宇、二哥鄧小宙都係作家，而佢由細到大都對家族生意無興趣，一心想入行從事演藝工作；鄧梓峰被指外貌似巴斯光年，亦因為佢以前做過皇家義勇軍人，所以近年又有「真人版巴斯光年」稱號出現，但鄧瓊芝就比較似媽咪，曾經被人話二人似足姊妹。鄧瓊芝當日除咗出席活動，仲幫手做埋模特兒，黑色晚裝裙上佈滿珠片，加上Deep V設計非常吸睛，但疑因裙身太重而頻頻露出肉色Bra邊，稍稍失手。鄧瓊芝坦言因為中意時裝，以前又成日同代蓮曦丹美結伴去時裝周，覺得做模特兒感覺幾好，所以唔介意試做一日模特兒，但就直指自己無諗過入行發展演藝事業。

鄧梓峰一向對仔女抱放任態度，支持佢哋做自己中意嘅事情，平日都成日擔任鄧瓊芝嘅模特兒畀佢影相，被問到會否將爸爸影到更似巴斯光年時，鄧瓊芝就笑言：「唔使影都似巴斯光年。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！