重視口碑 諗定續集 汪詩詩撐甄子丹新片 媲美《復仇者》

「宇宙最強」甄子丹主演的賀歲片前晚首映，獲太太捧場兼揚言「最鍾意」，難怪他笑言辛苦卻值回票價！

甄子丹前晚出席主演賀歲電影《天龍八部之喬峰傳》慈善首映，拍檔王君馨及張兆輝等紛紛現身。剛完成新加坡及馬來西亞宣傳之旅返港的子丹，談到終於有機會再與星、馬粉絲近距離接觸：「場面好震撼，電影市場好似冇受疫情及經濟影響，幾百人逼爆商場，粉絲仲叫我拍多啲戲。（係咪《天》片開續集？）未知，不過續集心目中已有故事結構。（對今次票房有信心？）票房好當然會開心，人總有高高低低，盡量做好、有口碑先。」其太太汪詩詩特意前來捧場，談到對《天》片的意見，她即滔滔不絕：「呢套係我最鍾意嘅電影，覺得精彩到好似《復仇者聯盟》咁，要不停追住睇！」子丹聞言即冧爆：「佢睇完《葉問》都只係話OK，佢咁講真係勝過晒一切喇！」

張兆輝想返無綫拍劇

張兆輝片中與「太太」惠英紅以拳腳比武「耍花槍」，談到首次與對方合作，他表示相當愉快，但難忘拍攝時正值炎夏：「我哋企喺度唔郁都全身濕晒。」提到在剛過去的無綫台慶頒獎禮擔任嘉賓，是否有興趣回巢拍劇？他直言：「不嬲都有聯絡，有劇本就問我有冇檔期，不過舊年我有8個月喺內地，根本冇時間。只要劇本好、角色適合嘅話，當然有興趣，如果喺香港拍戲，起碼可以返屋企。」

而王君馨演馬夫人，要騷腿跌膊色誘丐幫中人，問到有否擔心老公呷醋？她表示：「佢今晚都有嚟，不過佢睇慣我唔驚，反而唔敢畀爸爸睇！」對於能夠與子丹合作，她說：「能夠同丹爺合作係緊張同受寵若驚，遺憾冇得同『宇宙最強』過招。我膽粗粗畀自己動作嘅視頻佢睇，希望指點一二，佢都有教我竅門，希望日後有機會再結片緣。」