銀牌得主拎錯金牌公仔被網民洗版 「劍神」張家朗：大家好關心嘅公仔我換返啦

有「193劍神」之稱嘅港隊劍擊代表張家朗喺前晚（26日）舉行嘅東京奧運男子花劍決賽中，成功擊敗意大利選手加羅索（Daniele Garozzo）奪得金牌，為香港奪下史上第二面奧運金牌，令香港人全城歡呼狂賀！唔少市民收睇奧運直播，見證張家朗奪金及登上頒獎台嘅一刻，不過當中就發生一啲小插曲。

張家朗贏出比賽後接受香港傳媒訪問，期間加羅索疑似黑面經過，兼沒有與家朗打招呼。唔少網民睇完直播後都留言話加羅索冇體育精神。但其實事實並非如此，大家只要將訪問時間拉前少少，就可以睇到家朗對加羅索講thank you，而加羅索亦有伸手拍家朗背脊以示支持。

另外，因為疫情嘅關係，所有得獎運動員雖然自行拿取托盤上既獎牌、花束同埋紀念公仔。而獲得銀牌嘅加羅索喺拿取花束及紀念公仔時，拎錯咗屬於張家朗嘅紀念公仔。有網民認為加羅索只係唔小心拎錯咗，唔係一個大問題，不過亦有網民認為佢輸唔起，仲去佢IG留言指責話佢特登拎錯公仔，不過呢個行為令唔少香港網民覺得好失禮，馬上幫手留言道歉。

事後家朗亦有因呢件事回應，佢就話「眼見對方心情欠佳，一直未敢上前交換」 ，同埋話喺記者會時已經換返。去到今日，張家朗喺IG Story想上載金牌嘅公仔，並寫上「大家好關心嘅公仔我換返啦」及加上一個哭笑不得嘅表情符號。既然金牌公仔已經喺家朗手中，一班粉絲可以放心啦！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！