鋪路公開戀情? 菊梓喬甜笑勁讚吳卓羲:佢好好好好!

菊梓喬自爆從未慶祝過情人節。
菊梓喬自爆從未慶祝過情人節。

歌手菊梓喬(Hana)與吳卓羲(Ron)的緋聞近日升溫,Hana昨日出席活動有備而來,同Ron口徑一致,未有否認戀情,說到Ron時忍不住甜笑,又大讚對方人品好好:「我鍾意心地好嘅人。」

菊梓喬、胡鴻鈞與吳若希等昨日在將軍澳電視城出席無綫節目《慈善星輝仁濟夜》記者會,疫情下節目將如期在本月8日晚舉行直播,屆時只會有《仁濟》成員出席,不設現場觀眾。

情人節早有安排

有份表演的Hana,與Ron的緋聞情侶關係近日有突破性發展,除夕夜Ron帶同家人欣賞她演出的除夕騷,當時沒有否認戀情。問Ron是否其男朋友時?她說:「唔講呢啲喇!(Ron冇否認你係女友?)哈哈……唔講呢啲。(佢帶埋屋企人捧你場?)嗰晚好多朋友都帶咗屋企人嚟,好耐冇呢啲戶外騷。(感覺到佢追緊你?)感覺嘅嘢個個都唔同,嗰晚淨係感覺到好大風、好凍。(情人節點慶祝?)要為婚禮表演,其實不論自己有拍拖定冇拍拖,都冇慶祝過情人節。」

講到Ron的人品,Hana亦有讚冇彈,不停說「好好」,她說:「佢好好,係一個好好嘅人!好敬業嘅前輩,拍戲、拍劇都好睇,係一個好好嘅人。(鍾唔鍾意孝順仔?)梗係鍾意,孝順、心地好嘅人,有邊個唔鍾意?」至於Ron前晚出席電影首映,被問到可有邀請Hana出席?他即笑說:「係支持嘅梗係買飛啦!(遲啲陪佢睇?)我今晚都睇,未必會睇多次……唔好講呢啲嘢啦!」

Ron笑言叫菊梓喬買飛捧他的電影場。
Ron笑言叫菊梓喬買飛捧他的電影場。