鍾嘉欣事件持續發酵 「大鼻烈女」鬧粉絲烏蠅 千嬅躺着中槍

藝人鍾嘉欣早前被指是雙面人，事件引起廣泛討論，近日更有網民發起選出「大鼻」囂張明星，結果不少人爭相留言爆親身經歷，涉及21位藝人之多，雖然均以「化名」陳述，但已惹來無限揣測，當中楊千嬅與側田躺着中槍，認真陰功。

藝人身為公眾人物，言行舉止均成為粉絲監測目標，無綫前花旦鍾嘉欣因被自稱其街坊力數人前人後兩個樣，觸發有網民透過社交平台票選「大鼻藝人」，並以「揞名爆」分享個人遭遇，最終「大鼻藝人」三甲分別為「烈女」、「野花」及「命硬」，網友更指明「烈女」一定排首位，大爆「烈女」曾叫自己的粉絲做「烏蠅」：「十幾年前同太太去四川影婚照，回港時喺當地候機室見到『烈女』，佢本身已經黑面，之後有粉絲想同佢合照，佢話ok，但我之後聽到佢話助手：『有烏蠅嚟就幫我撥走佢』。」

力數21名藝人

其後不少網民即加碼分享自身經歷，有人聲稱曾被「E」報串而脫粉：「我小學嗰陣E嚟我哋學校附近拍電影，有幾個同學好鍾意佢，所以去問可唔可以影相，E話可以，企到好埋笑面迎人咁合照。結果轉個頭就打咗去校長度投訴，然後要求學校記佢哋『大過』。」還有人指「男人最痛」見到粉絲會擰歪面、「木偶怡」做二線姐仔時已沒有禮貌又寸嘴，至於「周國腎」一時Nice一時難頂，好睇心情。由於「群情洶湧」，網友的Post列舉21位「大鼻」藝人，當中還包括「歡樂今宵」、「勁舞Dancing Queen」、「花心」與「大天二」等，名單在網上引發激烈討論，競猜到底是誰，當中楊千嬅、周國賢、側田與楊茜堯等躺着也中槍，相當無奈。

當提到「冇架子」藝人時，網友都一致認同任達華是首選，大讚他為人友善，有求必應。另外，鄭伊健、梁朝偉、謝霆鋒與容祖兒亦榜上有名，人紅一樣好有品。