鍾柔美Yumi疑戀上劉展霆Eden 網民列出5大證據！

15歲嘅鍾柔美（Yumi）由《聲夢傳奇》出身後備受無綫力捧，除咗推出首支個人單曲《Breakin' My Heart》之外，Yumi與炎明熹（Gigi）、姚焯菲（Chantel）及詹天文（Windy）組成女團After Class出道。早前Yumi喺拍攝劇集《青春本我》時，與同劇演員28歲嘅劉展霆（Eden）被網民影到佢哋著校服一齊行街嘅照片，之後二人澄清當時只係拍緊劇。不過近日佢哋嘅緋聞再度引起關注，有網民更列出5大證據添呀！

證據一：網民聲稱見到佢哋拖手
有網民喺連登討論區聲稱自己曾經喺銅鑼灣見到Yumi同Eden拖住手行街街，不過見到人望嘅時候，就會即刻放開手。之後，唔少網民都表示唔相信，而呢位網民就話：「我講大話死全家」。

證據二：粉絲稱二人IG上互動頻密
有網民喺討論區上載多張TG group嘅截圖，截圖中有粉絲指Eden試過特登去Yumi生日主題嘅cafe、Eden IG限時動態成日玩暗示、Eden媽媽IG都有follow Yumi、Eden IG出PO後Yumi兩小時就like及一齊開抖音等等。

證據三：開設情侶IG？
有唔少情侶都會開設社交網站帳戶用來記錄二人嘅生活點滴，早前有網民發現有一個名為「1221.x1221」嘅IG帳戶，而呢個帳戶只有追蹤Yumi同Eden，再加上佢哋兩個都係12月21日生日，所以就猜測呢個係佢哋嘅情侶帳戶。不過有網民認為呢個唔算係情侶IG，因為只有Eden主動follow，而Yumi就未有follow該賬戶，所以就估計可能係Eden單方面開設帳戶。

證據四：Eden獲批follow Yumi私人IG帳戶
有粉絲指喺《青春本我》演員中，只有Eden一個追蹤Yumi嘅私人IG帳戶。

證據五：情人節Eden手拎豬公仔兼上載雪糕照片
喺今個情人節，Eden上載咗兩張相到社交網站，分別係佢雙手拎住《青春本我》吉祥物「青春常豬」及有兩隻手各自拎住軟雪糕嘅相片。有網民就發現Yumi喺劇中都有抱過呢隻豬公仔。

Yumi同Eden呢段緋聞被網民講到似層層，Yumi喺IG進行直播時疑似開腔回應，指自己現時只會專注喺學業同追夢上，冇時間做其他嘢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！