鐵拳英雄｜王君馨登場武打場面好精彩 網民：打得又睇得

TVB劇集《鐵拳英雄》正在熱播中，由陳展鵬、唐詩詠、陳山聰、姚子羚及王君馨、伍允龍及元秋等人主演，除咗演員陣容鼎盛之外，劇集有唔少緊張刺激嘅武打場面，增添不少追看性。王君馨（Grace）喺《鐵拳英雄》戲份甚重，不過上月宣布離開無綫後，佢嘅名字及劇照喺「TVB官方微博」竟然不見蹤影，當時唔少網民都戥佢唔抵。日前播映嘅第七集，王君馨終於出場，佢嘅武打場面深得網民喜歡，紛紛留言大讚。

王君馨喺劇中飾演​​​​十二路潭腿高手程安娜，細個嘅時候同媽媽丁細鳳（元秋飾）及大哥步青雲（陳展鵬飾）失散，長大後成為彭敬祖（黎振燁飾）嘅未婚妻，其後更與大哥所成立嘅華僑會有唔少誤會及捲入以金龍（歐瑞偉飾）為首嘅黑幫大戰。王君馨喺《城寨英雄》時表現亮眼，獲得觀眾高度評價，今次嘅《鐵拳英雄》繼續冇令觀眾失望，一出場就使出硬橋硬馬真功夫，喺貨倉與十多名大漢打鬥，非常精彩。唔少網民留言大讚，例如「好正，睇靚女打架真係一種享受。兩場打戲都好精彩，辛苦曬！」、「你打得好好睇 impressive and love it!​​」、「終於出場了!! 打得好型」、「終於等到了！閣下出場個種震撼力，TVB無一個藝人可以同你媲美！」、「好正，好有氣勢」、「安娜出場真係令人眼前一亮」及「姐姐真係又打得又睇得」等等。

現年35歲嘅王君馨，07年參選《全美華埠小姐》獲得第一公主（亞軍），同年參選《香港小姐競選》獲得亞軍，而且仲獲得最上鏡小姐同國際親善小姐。入行後佢一直默默耕耘努力付出，Grace參演過唔少劇集演出，例如《刑警》、《熟男有惑》、《耀舞長安》及《My盛Lady》等等，直到16年喺《城寨英雄》憑中飾演花曼一角人氣急升，獲得「最受歡迎電視女角色」​​，於2018年《是咁的，法官閣下》終於首次擔正做女一，演技得到肯定。除咗演戲之外，Grace喺呢一兩年更向邁向跳唱歌手之路，推出《Casada》及《尖叫》成為樂壇新人。另外，一向跳得嘅佢喺上年《盛舞者》擔任「盛舞導師」，真係睇得又跳得。雖然佢已經離開TVB，不過佢就話無論係唱歌、演戲定係跳舞，會都唔會停落嚟，因為呢三樣都可以俾到佢唔同嘅挑戰同滿足感。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！