長沙灣新開韓式Cafe 必試韓國特色全日早餐+南瓜芝士蛋糕

韓系風格嘅Cafe喺香港唔算常見，而長沙灣呢間新店更將韓食元素融入喺Cafe常見嘅食物當中，例如有泡菜同年糕嘅全日早餐、靈感嚟自辣雞麵同街頭小食魚糕湯嘅意粉等等。甜品同飲品亦有心思，仲會按季節推出期間限定，非一般打卡Cafe呀。

Wuli Cafe位於長沙灣元州街，店名係韓文「우리」嘅發音，係「我哋」、「我哋嘅」意思。店主曾經喺韓國生活過一段時間，留意到當地Cafe文化盛行，返到嚟香港想開一間唔單止可以畀大家影相打卡，更可以拉近關係嘅小店，因而取名「우리」。希望靠食物同服務，可以同熟客們成為朋友。

Cafe常見嘅全日早餐組合嚟嚟去去都係果幾款，但呢間Cafe就花心思將韓國食材加入去，唔突兀之餘仲有特色。例如用外微脆內鬆軟嘅煎韓國午餐肉條代替腸仔，嫩滑帶爽脆口感嘅泡菜雞蛋捲代替炒蛋。

再加上韓國泡菜同辣醬烤年糕，特別係年糕甜辣煙韌，有特色又易入口。炒雜菇亦會添加零舍香嘅韓國麻油，配搭牛角包同沙律，非常豐富。

店主指呢款意粉靈感嚟自韓國著名嘅辣雞麵之前出嘅忌廉卡邦尼版本，用咗韓國最經典嘅辣醬加上忌廉炮製醬汁，甜辣Creamy一試上癮！係大眾可接受嘅辣度，不過亦係會累積嘅嗰種辣勁，怕辣嘅朋友建議搵定朋友Share喇。配料加入韓國魚糕，口感結實Q彈，雞肉肉質亦嫩滑彈牙。

造型完全就係Emoji裡面嘅芝士呀！店主指因為南瓜味道比較淡，要先將烤過帶出香味，所以呢個慕斯嘅橙黃色就係嚟自烤南瓜蓉！慕斯口感軟滑，食落先有忌廉芝士嘅微酸同奶味，之後南瓜嘅甜香會慢慢滲出。亦可以點埋海鹽芝士奶蓋同上面嘅焦糖餅碎一齊食，奶蓋質地較輕盈，增加味道層次又唔會膩。

Pancake亦係可愛嘅波波造型，而裡面就係阿華田脆脆醬，店主話前後試過唔少口味嘅夾心，覺得阿華田最夾又夠大眾化。波波鬆餅外脆內鬆，中間嘅阿華田脆脆增加酥脆口感同麥芽甜味。甜味略嫌單一，建議可以同朋友分享。

小店嘅咖啡都有水準，House Blend係巴西（水洗及日曬）同坦桑尼亞豆嘅拼配，口感順滑、帶少少檸檬酸味同回甘。最近佢哋就推出好有冬日Feel嘅Salted Caramel Cinnamon Latte，以海鹽焦糖用肉桂粉配搭Latte，再喺上面灑糖用火槍燒成焦糖面，飲嘅時候建議唔好攪拌，一次過試到表面焦糖嘅香脆，同Latte嘅多重風味。杯邊嘅Lotus餅乾亦有即燒焦糖，苦甜香氣加倍。

賣相好Crazy嘅朱古力！唔單止有滿滿嘅忌廉同朱古力醬，杯裡面亦係用比利時70%朱古力粒沖出嚟嘅朱古力奶，香濃厚滑、甜度適中。上層嘅朱古力醬甜香更為濃郁。

Wuli Cafe
地址：長沙灣元州街482-492號金碧閣地下4號舖

文、相：Cathy.H