關智斌陷中年危機 狂啪補品救靚樣

現年41歲的關智斌身形弗到漏，不時在網上騷肌，不過前晚他出席活動時自爆有中年危機，每晚都要將白髮搽黑兼食骨膠原養顏，並公開凍齡秘密，認為最重要「保持心境低能」。

關智斌（Kenny）、衛詩雅與李幸倪等前晚出席慈善晚宴，Kenny透露剛拍完英皇電影《海關戰線》，甚多動作場面，還要出海取景。問到可有暈船浪？他說：「還好，可能我成日滑水，有次出海4、5個鐘都幾波濤洶湧，返到陸地先有少少暈船浪。」弗爆的他謙稱騷肌場面留給師兄謝霆鋒，無謂班門弄斧。

邵初最驚肚餓

Kenny透露正等待另一套新戲開工，現時每星期滑水3日，相當寫意。對於網民讚他Body靚，他笑言：「我都4字頭，所以難Keep，要花好多努力，都有中年危機㗎！晚晚要塗黑啲白頭髮，大家唔知啫。平時會食好多骨膠原、健康產品。」問到可有跟好友容祖兒、蔡卓妍等分享凍齡心得？他說：「唔係囂張，我哋真係有研究過大家點解好似唔識老，我諗最主要係我哋保持心境低能，真係幫到好多，我哋冇話40、50歲要做啲乜，都保持住20歲做緊嘅嘢。」

同場還有應屆香港小姐三甲宋宛穎、梁凱晴及邵初，宋宛穎讚今年候選港姐佳麗學歷高，又向師妹畀貼士，她選美期間堅持每日喝薏米水去水腫，梁凱晴則飲齋啡去水腫和飲檸檬水美白皮膚，而邵初笑言：「千祈唔好餓親，雖然要減肥，但係太肚餓個人就會跌Walt，所以我當時食好多飯。」