陳凱琳否認吸金千萬傳聞坦言唔開心 擔任新節目主持兼監製碌盡人情牌

陳凱琳（Grace）自2018年與鄭嘉穎結婚並先後誕下兩名兒子後，就開始減少幕前拍劇工作，創立自家品牌「雪后」之外，亦不時於社交平台大曬造型照及美妝教學，當中更有自家團隊協助拍攝，成功轉型做KOL及以節目主持為主，更奪得2021香港社交媒體風雲榜「品牌最愛」殊榮。近日有報導指陳凱琳兩年內吸金千萬元，但佢就喺接受電台節目《口水多過浪花》鄭裕玲（Do姐）訪問時直接否認，仲話睇到傳聞後唔係咁開心。

陳凱琳坦言一開始睇到報導有啲愕然同唔開心：「當然我賺嘅錢唔係咁大，呢樣嘢你又好難同人講，好難澄清，我唔舒服嘅位係感恩現有所有，亦都唔會成日話買好多名牌攞上嚟畀大家睇，我都唔係呢類型嘅人，即係我老公話點解咁鍾意我，係因為我好慳家，所以我聽到嘅時候覺得我唔想大家嘅注目去咗呢個錢銀上面。」陳凱琳又指，疫情期間大家工作上都有啲困難，呢個時候仲講呢啲嘢就覺得好唔舒服，一來無咁嘅事，二來唔想炫耀。

訪問中，鄭裕玲重提陳凱琳於2016年主持《萬千星輝賀台慶》將「TVB每一個藝人都係奮不顧身」講成「粉身碎骨」一事；陳凱琳就話無嬲過鄭裕玲，仲表示記得當年綵排時已講錯好多次，所以到正式時就算講錯咗都無意識到。而近日，陳凱琳為明珠台清談節目《Love Matter》擔任主持兼監製，首集請嚟同樣港姐出身嘅朱千雪作嘉賓，分享婚姻之道；之後亦會搵孖生細佬Derek喺移民加拿大前一同拍攝節目。被問到節目監製角色，陳凱琳就表示當時明珠台想製作自己嘅節目或劇集，就問佢有冇興趣做類似Talk Show嘅節目，結果因為自己做咗好多資料搜集，並喺開會時提出，就被提議兼任監製一職；陳凱琳直言覺得好感恩，成個過程學到好多嘢，例如剪片、搵嘉賓、寫稿，亦逐漸拿捏到拍攝重點。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！