陳奕迅粉絲自白|演唱會毛巾言論被斥冷漠無知 忠粉睇逾 10 場力撐:新疆真係太遠

【Yahoo 新聞報道】陳奕迅的歌聲,曾經牽動一整代人。新疆棉爭議令他陷入前所未見的危機,網上不少粉絲曾揚言與偶像割席,但其跨年演唱會依然大賣,一票難求。正當爭議似乎已平息,他在演唱會尾聲卻因自嘲不知無印良品毛巾「咩棉嚟」,再度招來惡評。「如果我露出了真身,可會被抱緊?」,歌聲以外,偶像的一言一行,粉絲都記在心裏,有人繼續追隨,有人忍痛別去。《Yahoo 新聞》找來陳奕迅的三位資深歌迷,細說他們經歷的內心交戰。

陳奕迅《Fear and Dreams》演唱會開足27場,場場爆滿。
陳奕迅《Fear and Dreams》演唱會開足27場,場場爆滿。

「離時代遠遠 沒人間煙火 毫無代價唱最幸福的歌」《我的快樂時代》

Kate、Katrina 和 KW(化名)是喜歡上陳奕迅十數至二十年的忠實粉絲。與不少香港人一樣,陳奕迅的廣東歌陪伴他們成長,度過人生的高山低谷。Kate 小時為了買陳奕迅的唱片和聽演唱會,奮力儲錢,「(陳)唱歌真係好好聽、好有感情,好似唱到去你嘅靈魂咁……佢喺舞台又好享受好投入……好似閃閃發光咁」。

Katrina 在 2006 年看過「Get A Life」演唱會,現場聽陳奕迅唱歌,深被震憾,正式「入坑」。多年來陳每逢推出唱片,出席簽名會、各大頒獎禮、小型音樂會、演唱會等,她從不缺席,「有次問佢可唔可以同佢握手,佢係會好誠懇咁捉住你,好大力咁同你握手、唔係 hea 握嗰啲」。KW 則形容陳奕迅的歌聲極具感染力,「好似一個大哥哥同你講緊佢嘅故事咁」,令他著迷足足20年。

Katrina自2006年開始迷上陳奕迅,簽名會、演唱會、頒獎禮,她從不缺席。
Katrina自2006年開始迷上陳奕迅,簽名會、演唱會、頒獎禮,她從不缺席。
Katrina儲下了偶像的簽名唱片及票尾。
Katrina儲下了偶像的簽名唱片及票尾。

「可惜我愛懷念 尤其是代我傷心的唱片」《綿綿》

那個快樂時代早已遠去,不少藝人近年身陷政治漩渦,陳奕迅也未能倖免。他 2021 年因新疆棉事件發聲明與 Adidas 割席,網民嘲諷其歌曲《綿綿》變成《棉棉》。當時 Kate 感難以置信,但 playlist 仍保留偶像的歌。直至事件再度發酵,有報道披露陳奕迅為那份聲明繳付高額違約金,引起 Kate 對新疆人權議題的好奇,搜尋有關資料過後,內心忐忑,「覺得好 shame(羞恥),唔想偶像折腰」。此後聽偶像的歌,心情不再一樣,「有啲難受,道德上好折磨…… 一聽就會諗起嗰啲新疆人…… 好懷念嗰時可以心無旁騖咁聽佢嘅歌」。與曾經深愛的偶像和歌曲割捨,談何容易?「好唔捨得因為咁嘅事,就唔再聽佢嘅歌」。

一張又一張Yes Card,是Katrina自小喜歡陳奕迅的印記,她強調「我鍾意佢個人,唔係淨係佢啲歌」。
一張又一張Yes Card,是Katrina自小喜歡陳奕迅的印記,她強調「我鍾意佢個人,唔係淨係佢啲歌」。

「當真相仿似是怪物藏在鐵箱 打開放出了又怎樣?」《衝口而出》

Katrina 的看法則截然不同,認為陳奕迅那位聲明只是「跟大隊」,「當年火燒連環船,聲明又係廿一克(陳的經理人公司)出、無親口講過、聲明又係倒模信嚟」。她慨嘆偶像「今次大 X 鑊」,作為歌迷會撐到底,「我唔在意人哋話我無道德。追咗(陳)十幾年,唔會道德判官上身指責佢」。她以「黃絲」自居,拒絕光顧某些快餐店和壽司店,亦明言不能接受集中營、強逼勞動等違反人權的行為,但她坦言「新疆真係太遠,覺得自己理唔到咁多」。但若果陳就香港議題表態而成為「藍絲藝人」,或會觸碰她的底線。

KW 的想法與 Katrina 相近,以他對陳奕迅的認識,認為聲明非其所願,因陳甚少對政治議題發表意見,「佢無去表達啲好維護中國、表示自己好愛呢個國家」;2019 年 9 月之後,他亦無參與內地真人騷及歌唱節目,反而在 2020 年疫情期間開設慈善演唱會,「幫助一班手停口停嘅演唱會業界人士,喺佢哋暫時失業期間有返啲收入」。因此繼續支持陳奕迅,對 KW 來說是順理成章,「我自己就無咩掙扎,因為我當下決定咗相信佢」。對於因新疆棉事件而與陳割𥱊的粉絲,KW 亦表示理解和尊重。

KW看了六場演唱會,他認為新疆棉聲明非陳奕迅所願。(受訪者提供圖片)
KW看了六場演唱會,他認為新疆棉聲明非陳奕迅所願。(受訪者提供圖片)
《Fear and Dreams》演唱會中,陳奕迅的唱功廣受好評,但一句新疆棉相關的自嘲,卻招來新一輪惡評。
《Fear and Dreams》演唱會中,陳奕迅的唱功廣受好評,但一句新疆棉相關的自嘲,卻招來新一輪惡評。

「他逼我記稿 那一邊叫我 過火的爆肚別太多」 – 《後台》

陳奕迅的《Fear and Dreams》跨年演唱會甫開售 5.8 萬張門票,即一日沽清,其後由 18 場加到 27 場,座無虛席,有網民嘲港人「無骨氣」。直到 1 月 11 日的第 25 場,陳在中場小休環節提起無印良品毛巾,笑稱「我唔知佢咩棉嚟㗎」,台下一遍笑聲,網上卻一遍罵聲。看了逾 10 場演唱會的 Katrina,當晚也在台下,暗忖「好心佢就收吓把口」。她沒有歡呼鼓掌,但不忘為偶像辯解,指其意思是「咪又屈我(撐)新疆棉」。看了 6 場的 KW 就認為,偶像性格跳脫,那句自嘲只是臨場爆肚,「嗰下諗到咩就講咩,唔會帶有任何計算喺入面」。不過他也對這個自嘲反感,「佢點會唔知新疆棉事件為佢趕走咗唔少fans,而佢用呢樣嘢嚟意圖開玩笑,係相當不智。」

《Fear and Dreams》演唱會,Katrina看了十多場。
《Fear and Dreams》演唱會,Katrina看了十多場。

「即使再見面成熟地表演,不如不見」 《不如不見》

當 Kate 得知陳奕迅再開演唱會,內心掙扎,男友也想看,最後還是作罷。陳奕迅那句自嘲,令 Kate 更認為自己的決定正確,「完全反映咗佢無知同冷漠,而佢仲覺得自己好好笑,但呢件事係一件要認真討論嘅事……如果我仲要畀錢佢賺,真係覺得精神同身體都出晒軌」。對於有網民讚陳今次「靚聲回歸」,Kate 直言:「已經覺得唔關我事,因為佢已經喺我生命入面消失」。Kate 會否視他為「某種老朋友」?「我係好反對呢個形容,我覺得佢唔配」。她多次以「ex」(舊情人)來形容陳奕迅,「我聽返啲舊歌,最多都只係懷念個 ex 咁」。

《我的快樂時代》是Kate最愛的歌之一,形容陳奕迅陪伴她度過了一個快樂時代,但不忘借歌詞形容陳自欺欺人,「難堪的不想 只想痛快事情 時間尚早 別張開眼睛」。
《我的快樂時代》是Kate最愛的歌之一,形容陳奕迅陪伴她度過了一個快樂時代,但不忘借歌詞形容陳自欺欺人,「難堪的不想 只想痛快事情 時間尚早 別張開眼睛」。

「當閒言再尖酸 給他妒忌多點 因世上的至愛 是不計較條件」 – 《無條件》

陳奕迅的自嘲再掀爭議,encore環節則叫好叫座。截至 1 月底,27 場 encore 的 YouTube 片段的觀看次數逾 1,320 萬。Katrina 認為,正是因陳在演唱會上狀態大勇,其自嘲言論才會引來「hater」(酸民)攻擊,「無得鬧爛聲,唯有鬧新疆棉」。「陳奕迅」三字也成為「流量密碼」,不少 KOL 紛紛加入戰團,「鬧陳奕迅就覺得自己幫咗新疆人,大家有咩資格去 judge(質疑)佢?」陳曾在第二場提及擔心演唱會銷情、Katrina 想告訴他:「唔使驚,鍾意佢嘅人係永遠都會相信佢,無嘢可以動搖」。作為忠實粉絲,她矢志不渝,「多謝佢繼續唱歌、無第一站就返大陸開演唱會,演唱會又準備得好好,同自己嘅 fans 爭一口氣,你永遠係我一世嘅偶像。」

資料來源:YouTube
資料來源:YouTube
陳奕迅在演唱會中,唱出《請相信我》時,舞台升起,下方的LED顯示「Do You Believe Me?」
陳奕迅在演唱會中,唱出《請相信我》時,舞台升起,下方的LED顯示「Do You Believe Me?」
尾場的時候,Katrina舉起「從前沒講今次要說多謝你」的手幅,「多謝佢繼續唱歌、無第一站就返大陸開演唱會」。
尾場的時候,Katrina舉起「從前沒講今次要說多謝你」的手幅,「多謝佢繼續唱歌、無第一站就返大陸開演唱會」。