陳展鵬重返樂壇 一哥變師弟

視帝陳展鵬相隔21年重返樂壇做「一哥」，但謙稱只是「師弟」，更「倒米」自嘲如果是老闆未必會簽自己，寧願花錢在更有意義的事情上，故十分感恩！他又將首支新歌送給「前世情人」，笑言老婆不會呷醋！

陳展鵬昨日出席加盟天盟娛樂暨新歌發布會，獲何麗全、樂易玲、天盟老闆顏培意、同門藝人組合天堂鳥（BOP）的Gordon、組合Bingo的Carman及Odilia等到場支持，除了播新歌《零歲》MV外，他又即場獻唱。談到相隔21年重出樂壇，問到可覺遲了很多？他說：「唔係，20年前公司畀機會我，但嗰時太幼嫩，個腦空白，依家好咗好多，又多咗人生經歷，今次有意義好多。」又謂3、4年前樂易玲已叫他唱番歌：「公司叫我唱番時都有啲掙扎，因為做演員唱歌走音都算，但做歌手就唔可以走音，而今年係好timing。」

問到可是天價加盟做一哥？他笑說：「媒體叫我一哥都係因為我年資高啫，師姐細我好多，但都好尊重我，我係師弟啫。至於係咪天價，依家嘅環境，難得預埋我已經好感恩。」他更「倒米」笑說：「如果我係老闆，都未必會簽自己，將啲錢做更有意義嘅事好過，因為我睇番自己有好多不足，所以老闆好勇敢。」他又謂此曲是送給囡囡，問到太太單文柔可會呷醋？他說：「唔會，佢好支持我，囡囡出世令我哋唔同晒。」講到現時有很多唱歌比賽節目，他指如果有機會都可以參與：「音樂冇分年紀同疆界，唔理咩台都好，最緊要可以百花齊放。」

Carman Gordon同場尷尬

另外，同場的Carman被爆因撻着《全民造星III》的CY，以致與「戴綠帽」的Gordon反面，2人同場全程零交流，Carman否認尷尬，Gordon就笑說：「其實冇乜嘢，但講完之後就有啲尷尬。」他們謂現時是同事關係，問到是否由情侶「降呢」？Carman說：「冇拍拖，之前係螢幕情侶，但依家各有各忙，少咗聯絡。」問到他們重新follow對方的社交平台未？Gordon尷尬笑說：「轉頭follow番囉。」Carman又澄清與CY沒有拍拖，只是朋友。講到Gordon又傳撻着「大埔LuLu」董嘉儀，他即甜笑說：「都係了解中，但依家工作行先，因為又有接劇，時間配合唔到，冇乜溝通。」