陳瀅睇騷 閃避方力申 胡鴻鈞攬寶「貝」 認關係「非常」

歌手胡鴻鈞（Hubert）一連兩場九展處男騷《Hubert Wu 2021 The Day After演唱會》前晚圓滿結束，「女友」蔡思貝首日偕父母秘密捧場後，尾場本想玩低調，但仍被記者認出，她即一臉錯愕又第一時間壓低Cap帽，之後才肯影相。

騷後無綫高層樂易玲及星夢娛樂CEO何麗全，聯同藝人何雁詩與老公鄭俊弘、吳業坤、黃智雯、羅天宇等到後台影大合照，蔡思貝當然走唔甩，3度與「男友」合影，Hubert更攬實其肩膊。

自爆雙方家長同場

Hubert形容2人關係是「非常之好朋友」，表示只知女方有捧頭場：「有問佢要唔要Artist飛。（唔係家屬飛？）Artist飛呀！佢話要開工，估唔到最後真金白銀買飛！（佢帶父母嚟！）知佢父母鍾意睇演唱會。」他又自爆父母有捧場，當被問是否雙方見家長？他即反問：「隔住幾十人咁見面呀？」再說到蔡思貝見他爆喊時亦感動落淚，是否心連心？他說現場有不少人都感觸流淚，令他很窩心。講回大騷苦練多時的爆肌成果，他直言想帶給Fans驚喜，又表示希望可以在更大的場地連開10場騷。

全晚另一焦點落在緋聞情侶陳瀅及方力申身上，向來大方回應「戀情」的他們，前晚「左閃右避」，當陳瀅見到小方到場時即落荒閃走，就座時更要羅天宇專登調位「隔開」，顯得極之避忌！