陶大宇演唱會今晚開騒將地球倒轉再倒轉 最後搶飛機會贏AirPods Pro

58歲陶大宇早前因翻唱《倒轉地球》爆紅，吸引唔少藝人模仿佢嘅演繹方法，大批網民仲力推陶大宇上樂壇頒獎禮；陶大宇與網上平台合作嘅演唱會《買轉地球陶大宇演唱會》亦將於今日（30日）晚上8點半開鑼，只此一場，「陶粉」絕對唔可以錯過！

演唱會以網上直播形式舉行，時間長達約45分鐘，仲係免費，只要登記成為該平台會員並完成認證、訂閱電郵推廣資訊，就有機會得到網上入場門票，名額先到先得；除咗可以欣賞到陶大宇載歌載舞，再次演唱《倒轉地球》將地球倒轉再倒轉，陶大宇仲會獻唱一首全新演繹嘅歌，觀眾更加有機會同陶大宇即時互動，贏取陶大宇親筆簽名相、AirPods Pro等豐富獎品。有網民喺該網上平台FB留言建議陶大宇可以獻唱古天樂既《男朋友》，又話覺得成件事好痴線，而該平台編輯就回應表示自己都覺得好痴線：「不過咁做都係想係年尾娛樂下大家，想大家笑下～」仲提到如果買唔到張敬軒演唱會，都可以留喺屋企一齊睇陶大宇咁話。

《買轉地球陶大宇演唱會》詳情
日期：2021年12月30日
時間：晚上8時30分
登記時間：即日至12月30日下午5時正
節目時長：約45分鐘
演出者：陶大宇
主持：袁潔儀
費用：免費

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！