陶大宇經典演出 唔止《倒轉地球》《心花放》狂掩面有原因

北上搵食嘅「師奶殺手」陶大宇，因為唱《倒轉地球》而成為網路紅人，甚至有網友喺facebook為佢設立群組，話咁快就有過萬人加入！其實大宇行走娛圈多年，經典之作儲落唔少，各位「陶寶」係時候回帶！

抖音拍片跳騎呢舞

內地社交平台抖音咁多網紅，要有人睇一定要出奇制勝，大宇就拍過跳騎呢舞嘅片，以58歲之齡計，咁靈活係好事。

《倒轉地球》以外 仲有《唱這歌》

《倒轉地球》被大宇唱紅之後，fans奔走相告，原來大宇北上商演仲唱過《唱這歌》、《愛你一萬年》等經典之作，同樣令耳朵流淚！

《心花放》集集掩面

話晒曾經係大台男一人選，梗要睇佢演技力作《心花放》。呢套30集劇入面，有網民計過至少有21集入面，陶大宇都會造出「掩面 ＋呀一聲」嘅動作。嗱，大宇多年後有解釋過，因為劇中角色設定冇咩戲好做，於是佢設計加入呢個動作。

《刑偵》Jessie變啫匙

當年大宇憑《刑事偵緝檔案》張大勇一角正式爬上一線，劇中佢嘅女友高婕（郭可盈飾）英文名叫Jessie，但係張大勇經常讀咗做「啫匙」「遮時」。早幾年《刑偵》重播有唔少觀眾捧場，連前主播方健儀都有煲劇，佢當時都有出post問「Jessie真係咁難讀咩？」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！