難忍「吓吓喺度擺甫士」 甄子丹堅持最真 還原武俠質感

「宇宙最強」甄子丹瞓身谷新片，近日已展開東南亞宣傳之旅的他，所到地方萬人空巷。對於演繹經典小說人物，子丹坦言如攀越一個高山，又指自己與角色曾有相似遭遇，但目前已學懂放下及珍惜。

子丹對電影《天龍八部之喬峰傳》十分看重，雖然該片於內地僅安排於影視串流平台上架，他依然落力宣傳，除於香港優先場接二連三驚喜現身外，近日更飛到新加坡、馬來西亞及韓國等地造勢。身在星、馬的他展開疫情以來首次與東南亞粉絲作近距離接觸，粉絲的熱情有增無減。

在決定開拍《天》片之初，子丹對「喬峰」認識不深，後翻查資料及觀看以往相關電視劇，才逐漸將人物形象化：「其實好多年前已經有人話我好似佢。喬峰好反映到現代人面對嗰種壓力，佢遇到不公平嘅指摘好豁達咁承擔，面對人云亦云嘅無理指摘，表現淡然。（同你好似？）咁我入行40年有高有低，作為知名人士企喺風浪嘅尖口，話冇（是非）就呃你，但隨着年紀增長會變得愈嚟愈成熟咁面對，明白生命好短暫，最緊要無愧於心，唔通吓吓走出嚟澄清咩？（依家冇嘢激到你？）係，可能都會有剎那嘅反應，始終係人嘛，但唔會對我有長久影響！」

順應網絡發展趨勢

談到此片未能登上內地大銀幕，子丹說：「我覺得每套戲都有自己嘅命，唔係我掌控到，咁電影唔係輸就贏，我都贏咗好多年喇，贏咪贏、輸咪輸囉！呢套戲一開始已經由3個影視平台投資，而網上發展係一種趨勢，喺電視睇到嘅亦未必唔係好嘢，作為一個創作人，只係想多啲人睇到自己嘅作品！」

他形容拍《天》片如成功攀越一個高山，2個小時的片長要盡量平衡原著小說的豐富色彩。問到是否滿意，他說：「電影永遠都會有遺憾，滿意唔會係百分百嘅事。最開心係可以做到90%冇用慢鏡，依家古裝片好多時冇咗武俠嘅質感，武者嘅特徵蕩然無存，大家吓吓喺度擺甫士，我堅持要畀觀眾追求到最真嘅感覺。」