雪姨三度道歉承諾退還全額租金予檔主 鍾培生留言支持令事件火上加油？

有「富貴KOL」之稱嘅雪姨早前將Ritz-Carlton、帝京酒店與基隆茶餐廳嘅迷你盆菜拍片比較嘅公關災難仍未擺平，唔少網民取消訂閱佢個YouTube頻道，短短幾日訂閱人數就由原先約32.4萬，跌至31.5萬（截至26日下午3時），佢有份主辦嘅新年市集亦出現退租潮，同時大量網民決意罷去其市集，令雪姨喺噚日（25日）再度發文道歉，又指所有檔主將獲退還全額租金及將自己市集檔內收益全數捐出，百億身家富三代鍾培生留言力撑，不過就惹嚟網民反感，直言：「關你咩事」。

雪姨噚日貼出有關新年市集特別通告，就之前疏忽作第3次公開道歉，表示連日來不斷沉思與反省，再次向基隆茶餐廳、新年市集檔主致歉，又指明白市集檔主籌備多時，為將影響減到最低，決定退還全額租金予所有檔主，檔主仍有權選擇是否繼續參與市集；另外，會將自己檔內全部收益捐到有需要團體，而受助單位將容後公佈。

大部份網民對雪姨今次道歉仲未收貨，表示佢嘅道歉完全無誠意，感覺似係驚以後搵唔到食先道歉，仲話希望佢從此喺YouTube界消失；亦有部份網民表示接受雪姨道歉，指人人都會犯錯，又斥責其他網民唔好一沉百踩。曾於疫情期間向多間茶餐廳大派逾1萬港元利是，以力撐飲食業嘅鍾培生就留言：「Take care all the best」，不過就獲網民洗版留言，指佢博出位：「你就慳啲啦！二世祖」、「大佬你慳啲啦」、「仲hea過講句恭喜發財，最多值得覆你一句ok thanks」、「媽寶一個，幾廿歲人成個bb咁，搞掂自己啲火山窿先啦」、「二世祖，喺度留言博人睇你？」等等，而鍾培生就懶理網民對佢嘅評價，只係留言回覆：「祝埋留下班人新年快樂，身體健康」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！