【電影LOL】《神奇女俠2》票房失利 打鬥場面唔夠刺激 觀眾負評︰以為睇溫情小品

全球受疫情影響,連帶戲院等娛樂事業受累。片商華納早前決定將2021年上映嘅電影於戲院、串流平台HBOmax同步,呢個決定令戲院業震怒,不過觀乎《神奇女俠2:1984》剛剛一星期全球開畫票房成績,又好明白佢哋嘅決定。

《神2》剛過去一個星期於32個地區開畫,暫時錄得3800萬美元(下同)票房,其中500萬票房嚟自IMAX,比預期6000萬票房差一大截,成績非常麻麻。最大鑊係《神2》中國內地票房失利,開畫比預期嚴重低開,連開畫冠軍都攞唔到!

華納買重內地票房,因為超級英雄電影一向喺內地好收得,第一集《神奇女俠》開畫勁收3800萬,埋單有9050萬;DC其他作品好似《水行俠》單日開畫勁收2460萬,連名氣差一截同製作成本低好多嘅《沙贊!神力集結》開畫日都勁收1640萬,《神2》開畫首日只得630萬!

作為下半年唯一一套超級英雄電影,加上睇好內地影業從新冠疫情復甦,結果《神2》成績大跌眼鏡,連北美以外最大票倉都失守!根據外媒The Hollywood Reporter報導,剛過去開畫周末僅收1880萬,只能成為票房亞軍,比起同日開畫、由林超賢導演《緊急救援》嘅3500萬少成一半咁滯。

票房成績一般同場次數量都有關係,《緊》嘅場次比《神2》多10%,首日場次多38030場,不過內地對於《神2》評價兩極,部份觀眾批評電影情節平淡,打鬥場面不足唔夠刺激,以為睇溫情小品。似乎靠口碑追票房呢招未必work,業界預計《神2》內地總票可能只及上集一半,認真慘情!

其地地區受疫情影響,就算戲院開返都表現疲弱,相信片廠唔轉陣分分鐘翻唔到身,要執笠!所以就算俾戲院業指責,華納都要起勢直追,壯大自家串流平台,唯有止蝕先可以繼續營運,喺電視睇總好過無哂戲睇!

始終戲院大銀幕嘅觀影體驗係無可取代,《神2》好睇定唔好睇,唯有再等下,遲啲入戲院睇啦!

更多電影文章

【電影LOL】一線阿姐Emily Blunt +金像編劇 拍節日電影Wild Mountain Thyme竟然失手?

【電影LOL】《權力遊戲》拍2套前傳 一套爛到要抽起 另一套不容有失

【電影LOL】Netflix 拍《幽遊白書》真人版 會唔會又崩壞?

【回顧2020.娛樂】英電影雜誌票選年度最佳50部電影 《天能》都係排38 三甲好有文青feel

【電影LOL】因新冠肺炎病逝 三大影展得獎大導 金基德重要作品回顧

【回顧2020.娛樂】2020全球搜尋量最高十大電影 《上流寄生族》居首