雅虎香港新聞 電影LOL︳《明日戰記》開畫累積收近600萬 破今年華語片紀錄
講咗好耐嘅古天樂監製新片《明日戰記》終於喺香港開畫，果然不負眾望。《明日戰記》電影FACEBOOK專頁公布開畫票房累積有589萬，成為今年香港開畫成績最亮麗嘅華語片。
留意返，官方所講嘅係「開畫票房累積」數字，因為之前套戲做咗唔少優先場，所以條數唔止得尋日單日票房收入。據業界人士透露，《明日戰記》開畫日有大約400萬票房收入，依然好彪炳。早前MIRROR成員Edan（呂爵安）主演嘅《闔家辣》開畫收133萬，而Edan隊友姜濤同柳應廷（Jer）主演嘅《阿媽有咗第二個》，更加錄得176萬開畫票房。
今年上半年受疫情影響，戲院大多數時間唔開，令到港片成績非常慘淡。上半年5套最賣座香港電影，冇一套票房多過100萬！踏入下半年，防疫限制鬆綁，情況當堂來個大逆轉，小本經營嘅《緣路山旮旯》靠口碑慢慢衝破600萬。前面提到2套MIRROR成員主演大片，《闔家辣》至今收破3100萬，《阿媽有咗第二個》亦已邁向2200萬，並成為今年最快超越2000萬嘅港產片。
不過以《明日戰記》走勢，相信會比《阿媽有咗第2個》更快收多過2千萬。而《明日戰記》下一個目標可能係晉身香港十大最高票房港產片。根據記錄，《明》至少要收5144萬以上，先可以將2007年嘅《長江7號》摒出十大。去年大收嘅《梅艷芳》以6240萬排最高票房港產片亞軍，冠軍係《寒戰II》收6682萬。古天樂話睇過《明日戰記》都係佢老婆，咁各位準古太，衝呀！
更多電影文章
電影LOL︳今期睇咩戲 明日戰記／One Piece Film Red／小教父／外太空的莫扎特
電影LOL︳《明日戰記》開畫累積收近600萬 破今年華語片紀錄
電影LOL︳「超人」亨利卡維爾成新占士邦大熱人選 當年試鏡落選 原因竟然係…
電影LOL︳《龍珠超劇場版：超級英雄》小爆冷 擊敗「最性感男人」成美國開畫票房冠軍
電影LOL︳桂綸鎂張孝全《猜猜我是誰》5年前一早踢爆電話騙案集團真相
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
