雅虎香港新聞 電影LOL︳8年前開始拍 七大香港導演合拍鉅作《七人樂隊》7月底上映
一直都只聞樓梯響、由七大香港導演攜手執導嘅電影《七人樂隊》，今日推出正式預告片，並且確認喺7月28日上映。
《七人樂隊》由洪金寶、許鞍華、譚家明、袁和平、杜琪峯、徐克及已故導演林嶺東聯手，杜琪峯兼任監製。呢個project意念好有趣，本來叫《八部半》，由各位大導各自拍一段十幾分鐘嘅短篇，吳宇森導演一度係成員之一，後來因為健康理由而退出，於是改名做《七人樂隊》。電影以1950至2020年代嘅香港故事為主題，以抽籤決定邊個導演負責某個年代故事，中間嘅70年代就懸空俾本身抽中嘅吳宇森。而且全片係以菲林拍攝，2014年已經開工，並且參加咗2020年第73屆康城影展、同年嘅釜山影展，亦喺去年嘅香港國際電影節上映。。
七個故事分別如下︰
洪金寶－《練功》（1950年代）。童年時跟師傅于占元學藝嘅大哥，將自身經歷呈現於故事之中，更加搵阿仔洪天明主演。
許鞍華－《校長》（1960年代）。校長與舊生再聚，從而憶起60年代嘅香港。講情懷，係Ann導拿手好戲。
譚家明－《別夜》（1980年代）。天一光，年青戀人就要各散東西。拍過《烈火青春》嘅譚家明，拍嘅時候應該冇預計到，而家唔少年青人，竟然要面對同樣嘅處境。
袁和平－《回歸》（1990年代）。「竹升妹」孫女回港，與爺爺短暫同居嘅小品故事。係，「八爺」唔拍打戲（都有少少打鬥場面啦）拍溫情小清新，林愷鈴同元華飾演爺孫。
杜琪峯－《遍地黃金》（2000年代）。三個年青人在茶餐廳一言一語嘅對話，展現香港人核心價值︰搵錢！炒！演員包括「膠人」之一嘅「肥腸」（徐浩昌）。
林嶺東－《迷路》（2010年代）。任達華飾演嘅老翁喺中環蕩失路，展現城市發展帶來嘅無奈。呢套係林嶺東導演嘅遺作，同過去林導硬朗風格截然不同。
徐克－《深度對話》（2020年代）。完全虛構嘅場景，超乎現實嘅故事，精神科醫生同病人嘅「瘋狂」對話。
七個故事以外，《七人樂隊》尾聲仲有半個故事以展望未來。拍攝到上映之間，香港都有唔少變化，相信觀眾會喺《七人樂隊》睇到一種奇妙嘅情感。
更多電影文章
電影LOL．今期睇咩戲︳侏羅紀世界：統治霸權／逃獄兄弟3／春宮 野史 大批鬥／如果有一天我將會離開你
電影LOL︳荷里活怪獸級新人 Rachel Zegler做完白雪公主再拍《飢餓遊戲》前傳
電影LOL︳畢列谷巴再次自導自演 新片Maestro演傳奇作曲家後生做到老
電影LOL︳康城影展 湯唯IU「失落」影后寶座 未必因為演技 同規則有關？
電影LOL︳貓王傳記片打破家屬例必唔撐定律 男主角入戲太深拍完入醫院
電影LOL︳IU做媽媽 日本導演是枝裕和拍韓片《孩子轉運站》 棄嬰收集箱引發的人情故事
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
