【電影LOL】內地翻拍《五個撲水的少年》 角色設定改到面目全非

受新型冠狀病毒影響,人人都要保持社交距離,喺香港想拍嘢隊crew都唔可以多過4個人!全世界嘅電影業及劇集製作接近停工,不過中國內地最近聲稱疫情已受控,武漢解封,有唔少電視劇都開返工拍攝。日前黃曉明於成都為《危機先生》復工,吸引大批民眾到現場睇熱鬧,人山人海人逼人,拍戲又唔戴得口罩都幾搵命搏!

電影方面亦慢慢復工,光線傳媒剛剛出咗個演員招募公告,正式翻拍日本2001年嘅喜劇《五個撲水的少年》,所以要搵5個男演員,年齡不拘最好識游水!印象中《五個撲水的少年》係青春校園劇,全部都係著住校服嘅高中生,但招募條件無年齡限制,會唔會其實一早內定咗班底?不過有名有姓嗰班明星,又有幾多個肯著條少布泳褲仔拍先?

日本版《五個撲水的少年》推出時,卡士近乎全新人,當時最紅應該係飾演海豚訓練員嘅竹中直人!男主角妻夫木聰同玉本宏都仲係寂寂無名,演出無包袱亦無尺度,情節非常瘋狂!故事以全日本第一隊韻律泳男子組威水史為藍本,講述面臨解散命運的唯野高校游泳隊,隊員祇剩下全無鬥志可言嘅三年級生鈴木(妻夫木聰 飾)。

當新到任的靚女教師佐久間成為顧問後,隊員一下子增加到三十人。然而,佐久間的意願並非教授游泳,原來是希望成立韻律泳隊。當大家知道佐久間的目的後,都雞飛狗走,祇有鈴木、佐藤(玉木宏 飾)、太田裕一(三浦哲郁飾)、金澤孝志(近藤公園飾)以及早乙女(金子貴俊飾)留低…

點知佐久間突然要生仔,五個人唯有頂硬上自學韻律泳,期間爆出唔少意外,訓練期間被誤當浮屍上咗電視而大紅,結果5人小隊變成幾十人男子隊,齊齊發展所長於校慶表演男子韻律泳!

日本人拍青春熱血特別有一手,鈴木同補習社同學靜子嘅羞澀純愛亦相當可愛,不過事隔多年翻拍成內地版,最令人擔心係難以拍出日版嘅純真直接。今時今日仲講純愛暗戀,手都唔拖下,感覺好離地喎!不過睇返光線傳媒出嘅角色簡介,相信內地版會大幅改動,因為對唔返日版角色!

鈴木變成李偉,被形容為「耐看」、「心底渴望散發光芒」;高飛(佐藤?)係校草級男神,曲小東「長相普通、受女孩歡迎」;陳銘涵(金澤?)變成清秀學霸,王子係熱愛跳舞及游泳嘅小胖。日版好跳得嘅太田係為咗練肌肉而加入嘅排骨精!日版設定明明個個其貌不揚,內地版變哂做靚仔,仲多咗個校花家姐,而日版相當搶戲、暗戀佐藤嘅早乙女一角就直頭無咗影!

其實又要過審又要搵內地標準小鮮肉,又改到啲角色設定唔同哂,點解唔索性寫過個原創劇本?反正拍完分分鐘連片名都改埋,「撲水」呢個廣東話詞語,北方人明唔明先?

更多電影文章

【電影LOL.煲劇抗疫】唐詩詠大讚!韓劇《夫妻的世界》大婆復仇無得輸

【電影LOL.外語930】影后前傳 那些年Emma Stone少少咸多多趣嘅校園喜劇

【電影LOL.疫情影響】新片全線改期 本地戲院轉陣放映經典名片

【電影LOL】《叔.叔》一窺銀髮同志的世界

【電影LOL.疫情影響】骨牌效應 迪士尼Marvel全線大片改期上映