【電影LOL】新串流平台Quibi玩短小精悍 起朵之作玩吹氣公仔?!

如果你嘅情敵係個吹氣公仔,你會點做?最新加入串流平台大戰嘅Quibi,剛剛推出新作品Dummy,講述由《完美巨聲幫》嘅Anna Kendrick,發現男友有小三仲捉姦在床,不過對方竟然係個吹氣公仔!

發現男友享受同吹氣公仔搞嘢多過同自己已經夠傷心,唔知係唔係太衝擊,Anna發現小三呢隻公仔竟然有感情、識講嘢仲係女權份子,大大聲同Anna講「大家推翻父權之前,個個都係吹氣公仔」!嚇到佢走去睇心理醫生,不過醫生當佢係其中一個受情傷嘅中女,傷心過度有幻覺,教佢要醫好情傷唯有同吹氣公仔和平共處!

就係咁,Anna當隻公仔係閨蜜,形影不離仲帶埋返工,又一齊去旅行,荒山野嶺睇水隨地小解,又一齊跳舞、講男人溝仔,沿途做盡好姊妹先會做嘅事!旅途中又真係被Anna發現不一樣嘅自己!

Dummy由Cody Heller編劇導演,故事受佢未婚夫Dan Harmon(創作電視劇Rick and Morty果位)啟發。自從佢發現自己條佬收埋隻吹氣公仔之後,就忍唔住成日諗男友會同隻公仔搞啲咩,如果隻公仔識郁,佢會點相處?結果諗得太多,決定將佢寫成劇本仲拍成Dummy,因為故事有趣,最後吸引咗Anna Kendrick參演兼做埋監制!

Quibi平台最有趣嘅地方係佢嘅內容都係短小精悍,專拍嚟用手機睇,所以普遍長度得10分鐘左右!雖然短,唔等如無質素,新加入內容除咗有剛剛介紹過嘅Dummy,仲有《蜘蛛俠》導演Sam Raimi主理嘅驚慄系列50 States of Fright,其中故事有驚又有笑!仲有由Matt Rogers及Dave Mizzoni主持嘅Gayme Show,專為大家介紹時下流行點滴,由音樂電影時裝,應有盡有!

Quibi暫時未開到香港,不過佢講到明佢放眼全世界,幾時開放地區應該係遲早問題,暫時可以免費睇3個月,之後就收5蚊美金月費。條條片10分鐘左右,睇多幾條都係有限時間,啱哂在家工作中間好需要take個break嘅各位,不失為追劇睇戲以外另一個好選擇。

更多電影文章

【電影LOL.外語930】《茱莉對茱莉亞-隔代廚神》只要有心 人人都可以係食神

【電影LOL】迪士尼翻拍停不了 搵「Elton John」拍新版《羅賓漢》

【電影LOL】內地翻拍《五個撲水的少年》 角色設定改到面目全非

【電影LOL.煲劇抗疫】唐詩詠大讚!韓劇《夫妻的世界》大婆復仇無得輸

【電影LOL.外語930】影后前傳 那些年Emma Stone少少咸多多趣嘅校園喜劇