【電影LOL】迪士尼翻拍停不了 搵「Elton John」拍新版《羅賓漢》

當你有個龐大嘅經典劇目,而又需要提供大量內容俾自家串流平台,最有效同最慳到版權費嘅方法,應該就係不停翻拍自己啲經典作品,咁做可以一雞兩吃 — 同一個故事有舊版有新版,內容即刻變雙倍,仲唔駛同人傾個版權返嚟,隨時可以開工拍戲!

講緊呢間公司係迪士尼,近年佢地喺電影方面做得有聲有色,Marvel電影、新收購嘅二十世紀霍士影業於票房吸金有一手,加上本身迪士尼旗下坐擁大量經典故事,內容方面勁豐富,接近無對手!剛剛仲開埋串流平台Disney+,不過就算有3間電影公司在手,似乎都唔夠內容撐。所以佢地開始專門製作只於Disney+播映嘅內容,包括翻拍自家經典故事。

其實迪士尼近年都翻拍咗唔少故事,包括《獅子王》、《小飛象》、《花木蘭》、《小姐與流氓》,未拍好嘅有《美人魚》,最新會翻拍嘅仲有1973年推出嘅動畫長片《羅賓漢》!《羅賓漢》故事耳熟能詳,拍過多次電影,由Russell Crowe到Taron Egerton都做過,講述羅賓漢及同伴劫富濟貧嘅故事。

不過,73年動畫版本嘅羅賓漢係隻狐狸、Little John係隻熊,而王子係隻獅子。當年首主題曲Love仲獲提名奧斯卡!至於只於Disney+播映嘅新版都落重本,將會結合真人與特技,一眾動物主角將以類似《魔幻森林》、《小飛象》等擬人化方式呈現,據聞仲會係音樂劇,製作成本無因為只上小銀幕而縮皮!

故事方面迪士尼亦希望加入新意,編劇搵嚟新版《小姐與流氓》嘅Kari Granlund執筆,導演則搵嚟《緩刑72小時》(Blindspotting)受到關注嘅Carlos Lopez Estrada執導。導演係影展常客,前作《緩刑72小時》入選2018年辛丹斯電影節,香港當年都有上映。

《緩刑72小時》集劇情、喜劇於一身, 講述哥連的緩刑只剩最後三天,只求避免惹禍上身,但他的老死麥爾斯擅長撩事鬥非,唯恐天下不亂。哥連因一個意外違反宵禁令,使他洗心革面的努力付諸流水,他與麥爾斯一黑一白、老友鬼鬼的關係也面臨重大考驗。

導演將強勁hip-hop融入高潮迭起的劇情,不平則鳴,揭露暗藏在美國繁榮和平表象之下各種歧視、暴力、身分認同和槍械問題,連奧巴馬都大力推薦!

今次Carlos接手拍迪士尼《羅賓漢》,應該唔止合家歡、歌舞昇平家庭片咁簡單,相信迪士尼對佢亦好有信心。因為除咗《羅賓漢》,迪士尼仲搵咗佢拍另一部長片!由獨立製作轉投影業龍頭懷抱,期待Carlos為經典故事加入新意義!

更多電影文章

【電影LOL】內地翻拍《五個撲水的少年》 角色設定改到面目全非

【電影LOL.煲劇抗疫】唐詩詠大讚!韓劇《夫妻的世界》大婆復仇無得輸

【電影LOL.外語930】影后前傳 那些年Emma Stone少少咸多多趣嘅校園喜劇

【電影LOL.疫情影響】新片全線改期 本地戲院轉陣放映經典名片

【電影LOL】《叔.叔》一窺銀髮同志的世界