雅虎香港新聞 電影LOL︳《假冒女團》Anson Lo港女look曝光 仲有素顏頹樣沖涼露肉場面睇
人氣偶像Anson Lo盧瀚霆近日密密為其大銀幕處男作《假冒女團》做宣傳，「教主」提到為電影佢要男扮女裝仲有唔少動作場面，為角色做咗唔少事前功夫。講咗咁耐一直冇清楚見過個女裝look，日前電影終於推出正式預告片，估唔到有驚喜！
片中見到「教主」有多個造型，首先有戴及肩長假髮造型，配以港女十式中嘅反眼及嘟嘴飛吻，個look意外地嬌俏，好有青春少女feel！其實個假髮造型真係幾似女仔，不過個look似乎佔戲唔重，之後多以短髮加濃妝示人，配以中性超窄褲服飾，雖然睇得出「教主」有裝胸作勢，不過無咗個假髮，點睇都唔似女仔喎！
《假冒女團》又唔止睇教主個女裝look，佢個保安素顏造型仲驚喜呀。平時出席活動執到靚一靚嘅教主竟然用素顏頹樣拍戲，比女妝更罕見！Anson訪問期間透露為角色試咗多款妝容，由極濃妝開始試起，連著咩衫都仔細諗過度過，好認真。
戲中「教主」仲有唔少動作場面，跳開舞嘅佢手腳靈活，不過應付打鬥場面都要重新學習，佢自己都話幾場打戲事先排練度好哂位，兼要就埋鏡頭，睇落瀟洒其實拍時好緊張！
Anson Lo首次做電影男主角，可謂落足心機投入角色，素顏、扮女仔、裝胸、明明好叻跳舞但要扮唔識跳舞，其中一幕仲要沖完涼露肉走光俾其他女團成員Alina、蘇皓兒睇，認真豁出去！相信神徒們會睇得好開心，就算唔係fans當青春喜劇睇都得，老實香港都好耐無出一套柴娃娃，啲gag香港人先明嘅熱鬧笑片，偶爾都需要輕鬆笑下！
《假冒女團》講述國際保障未成年少男少女身心健康發展協會會員Dr.K (譚耀文) 質疑司徒老闆（林敏聰) 舉辦的選秀活動「新星產線」利用年輕人追夢的心理，從中榨壓勒索，嚴重危害大批青少年身心發展，然而協會目前面臨營運困難，只好將貨就價重新聘用被革職的問題會員雷紫荊（盧瀚霆) 協助調查，意外令娛樂記者夏日葵（蘇皓兒）、九線歌手白百合（李靜儀）及解救堂妹元萱（陳紫萱）的元螢（李炘頣）組成假冒女團參賽⋯
電影11月25日上映。
更多電影文章
電影LOL︳今期睇咩戲 智齒／捉死敢死隊：魅來世界／王者世家／鱷魚／機動戰士高達I劇場版／幪面超人聖刃＋機界戰隊全開者
電影LOL︳《蜘蛛俠：不戰無歸》預告片登場 蛛絲馬跡睇出齊集三代蜘蛛俠？
電影LOL︳Disney+狂炒冷飯 Amy Adams再演天真嬌俏公主 湯漢斯演新版《木偶奇偶記》
電影LOL︳Disney+節目晒冷 大量Marvel角色單飛拍劇集
電影LOL︳觀眾陰影太大？ One Piece拍真人版 造型照曝光已經有負評
電影LOL︳BL劇《只因我們天生一對》電影版 12月香港上映
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
